नवौ दिनमा श्रीमति र भान्जीद्वारा भेटघाट,प्रधानमन्त्रीमा कुनै संक्रमण छैन : निर्देशक खड्गा

काठमाडौँ,  ३०  फागुन । मिर्गौला प्रत्यारोपणको ९ दिनपछि श्रीमती राधिका शाक्यले बिहीबार अस्पतालको आईसीयुमा पुगेर प्रधानमन्त्री केपी ओलीलाई भेटेकी छन् ।यसअघि उनलाई मिर्गौला दाता समीक्षाले भेटेकी थिइन् भने आज पत्नी राधिकाले भेटेकी हुन् ।शिक्षण अस्पतालले विज्ञप्ति जारी गर्दै अस्पतालका कार्यकारी निर्देशक प्रेमकृष्णा खड्गाले प्रधानमन्त्रीको स्वास्थ्य अवस्था सामान्य रहेको जनाएका छन् । ‘सबै स्वास्थ्य सुचक सामान्य छन्’, उनले भने, ‘मिडियामा सार्वजनिक भएजस्तो प्रधानमन्त्रीलाई केही संक्रमण छैन ।

        ’प्रधानमन्त्रीको स्वास्थ्य परीक्षण नियमित रुटिनमा भएको पनि अस्पतालले जनाएको छ ।फागुन १९ गते अस्पताल भर्ना भएका प्रधानमन्त्री ओलीको २१ गते मिर्गौला प्रत्यारोपण भएको थियो । मिर्गौला दाता समीक्षाको बुधबार डिस्चार्ज भए पनि प्रधानमन्त्रीको अस्पताल बसाइ भने लम्बिएको छ ।प्रधानमन्त्रीको सरकारी निवास बालुवाटार स्वास्थ्य परीक्षणलगायतको उचित व्यवस्थापन भएपछि मात्रै उनलाई डिस्चार्ज गरिने बताइएको छ । उनलाई मिर्गौला दिने समीक्षा संग्रौलाको भने वुधबार नै डिस्चार्ज भएको छ ।