भारतमा कोरोना संक्रमित ५ हजार नाघ्यो, ज्यान गुमाउनेको संख्या १५० पुग्यो

एजेन्सी २६ चैत । विश्वव्यापी महामारीको रुपमा फैलिएको कोरोना भाइरसको संक्रमण भारतमा पनि बढ्दो रुपमा देखिएको छ । भारतमा एकैदिन ५ सय ३३ जनामा संक्रमण देखिएसँगै संक्रमित हुनेको संख्या ५ हजार ३३१ पुगेको छ । भारतमा पछिल्लो २४ घण्टामा १४ जनाले ज्यान गुमाएसँगै मृत्यु हुनेको संख्या १५० पुगेको  जोन हप्कीन्स विश्व विद्यालयको तथ्याङ्कमा उल्लेख छ ।

        भारतमा संक्रमितमध्ये ४२१ जना उपचारपछि निको भएर घर फर्केका छन् भने ४ हजार ७७० जनाको अस्पतालहरुमा उपचार भइरहेको छ । चीनको वुहानबाट शुरु भएको कोरोना संक्रमणको दर यूरोपियन मुलुक हुँदै पछिल्लो समय अमेरिकामा तीव्र देखिएको छ ।

            विश्वभर महामारीको रुपमा फैीलएको कोरोना भाइरस (कोभिड–१९) संक्रमणका कारण मृतकको संख्या ८२ हजार २० पुगेको छ । विश्वभर एकै दिन थप ७ हजार ३४१ ले ज्यान गुमाएका छन् । विश्वभर कोरोना संक्रमण १४ लाख २८ हजार ४२८ मा पुष्टि भइसकेको छ । त्यस्तै ३ लाख १९८ निको भएर घर फर्केका छन् । अमेरिकामा कोरोनाबाट ज्यान गुमाउनेको संख्या १२ हजार ८४४ पुगेको छ ।