कोरोना कहरः १ लाख ८४ हजारभन्दा बढीको मृत्यु, संक्रमित २६ लाख ३७ हजार नाघ्यो

एजेन्सी, ११ बैशाख । विश्वभर महामारीको रुपमा फैलिएको कोरोना भाइरसको संक्रमणले मृत्यु हुनेको संख्या विहान समाचार तयार पार्दासम्म १ लाख ८४ हजार २ सय ३० पुगेको छ । त्यस्तै कूल संक्रमितको संख्या २६ लाख ३७ हजार ७ सय ९० पुगेको छ । कोरोना भाइरसको महामारीले अमेरिकामा मात्रै मृत्यु हुने मानिसको संख्या ४७ हजार नाघी सकेको छ ।  थप २ हजार ३२१ जनाको मृत्यु भएसँगै कोरोनाबाट अमेरिकामा मृत्यु हुनेको संख्या ४७ हजार ६७६ पुगेको हो । अमेरिकामा संक्रमित हुने मानिसको संख्या ८ लाख ४८ हजार ९७४ पुगेको छ ।

            अमेरिकामा संक्रमितमध्ये ८४ हजार ५० जना उपचारपछि निको भएका छन् । उपचार गराइरहेका ७ लाख १७ हजार २६८ जनामध्ये १४ हजार १६ को अवस्था गम्भीर रहेको छ । कोरोना भाइरसले इटालीमा बुधबार एकै दिन ४३७ जनाको मृत्यु भएको छ । योसँगै इटालीमा मृतकको संख्या २५ हजार ८५ पुगेको छ । इटलीमा संक्रमित हुने मानिसको संख्या १ लाख ८७ हजार ३२७ पुगेको छ । इटालीमा संक्रमितमध्ये ५४ हजार ५४३ जना उपचारपछि निको भएका छन् ।  

            स्पेनमा पछिल्लो २४ घण्टामा कोरोना भाइरसले ४२१ जनाको मृत्यु भएको छ भने ४ हजार २२१ जना नयाँ संक्रमित थपिएका छन् । योसँगै कोरोना भाइरसको महामारीबाट स्पेनमा मृत्यु हुनेको संख्या २१ हजार ७१७ पुगेको छ । कोरोना भाइरसको तथ्यांक संकलन गरिरहेको वल्र्डमिटर इन्फोका अनुसार युरोपेली मुलुकहरुमा १ लाख ११ हजार २०२ जनाको मृत्यु भइसेको तथ्याङ्कमा उल्लेख छ ।