कपिलवस्तु १२ वैशाख ।कपिलवस्तुको शिवराज नगरपालिका भित्र रहेका तीन वटा क्वारेनटाइन स्थलमा बसेका नागरिकहरुलाई स्वास्थ्यकर्मीले खाना खुवाउन थालेका छन् । शिवराज नगरपालिकाले चन्द्रौटामा रहेको एक क्याट्रीङ्गलाई जिम्मा दिएको भएपनि क्वारेन्टाइनमा बसेकाहरुले असुन्तुष्टि जनाएपछि नगरले स्वास्थकर्मीहरुलाई जिम्मा दिएको हो । नगरपालिकाले गरेको अनुगमनका क्रममा क्याट्रीङ्ग संचालकले खाना स्वास्थकर नदिएको पाएपछी सम्झौता रद्ध गर्दै खानाको प्रवन्ध मिलाउन स्वास्थ्यकर्मीलाई जिम्मा दिएको नगरपालिकाका प्रमुख प्रशाकिय अधिकृत शेषकान्त पौडेलले बताउनुभयो ।
शिवराज नगरपालिका ३ मा रहेको सुपादेउराली क्वारेन्टाइनमा स्वास्थ्यकर्मी जित बहादुर विसी,राजेश कुवर र हनुमान प्रसाद कहारलाई जिम्मा दिइएको स्वास्थ्य शाखा प्रमुख चुरामणी भट्टराईले बताउनुभयो । शिवराज नगरपालिका ५ चन्द्रौटा दुर्गा मन्दिरको क्वारेन्टाइनमा प्रमोद ज्ञवली,विष्णु क्षेत्री र लेखनाथ पौडेललाई खाना खुवाउन जिम्मा दिइएको छ । शिवराज नगरपालिका ९ बिजगौरीको विद्यालयमा रहेका नागरिकहरुलाई बिरेन्द्र कुमार मिश्र र प्रकाश पोख्रेलले खानाको व्यवस्थापन गर्ने जिम्मा पाएका छन् । क्वारेन्टाइनमा बसेका नागरिकहरुलाई स्वस्थकर खाना खुवाउनुपर्ने भएकोले स्वास्थकर्मीले सहजिकरण गरेको स्वास्थ्य अधिकृत लेखनाथ पौडेलले बताउनुभयो ।
शुक्रवार सम्म शिवराज नगरपालिकामा ८६ जना नागरिक क्वारेन्टाइनमा रहेका छन् । सुपा देउरालीमा ३८ जना,दुर्गा मन्दिरमा १३ जना र बिजगौरी विद्यालयमा ३५ जना रहेका छन् । उनीहरुलाई बिहान ८ बजे खाँजा, ११ बजे खाँना दिउसो ३ बजे खाजा र साँझ ७ बजे खाँनाको व्यावस्था गरीएको छ ।
प्रतिक्रिया