कपिलवस्तुमा वडाध्यक्षमाथि गोली प्रहार,आरोपित एकजना पक्राउ

कपिलवस्तु, १९ बैशाख । यशोधरा गाउँपालिका वडा नम्बर ८ का वडाध्यक्षमाथि गए राति गोली प्रहार भएको छ । वडाध्यक्ष सहाबुद्दिन मुसलमान  गोली प्रहार भए पनि  अध्यक्ष सकुसल रहेको बताइएको छ ।  राति करिब १ बजे वडा नं ८  खोरिया गाउँस्थित आफ्नै निवासमा सुत्नुभएका मुसलमानमाथि चार राउण्ड गोली प्रहार भएको जिल्ला प्रहरी कार्यालयका प्रहरी नायब उपरीक्षक सुनिल मल्लले जानकारी दिनुभयो । 

            वडाध्यक्ष मुसलमानलाई प्रहार भएका कुनै गोली उहाँलाई नलागेको प्रहरीले जनाएको छ ।  घटनामा संलग्नता रहेको आशंकामा स्थानीयवासी पप्पु मुसलमानलाई नियन्त्रणमा लिइएको प्रनाउ मल्लले बताउनुभयो । स्थानीयवासीका अनुसार वडाध्यक्ष मुसलमान र पप्पुबीच पहिलेदेखि नै विवाद हुँदै आएको थियो । दुई  अज्ञात व्यक्तिले रिभल्वरले उहाँलाई गोली प्रहार गरेका थिए । घटनाका सम्बन्धमा थप अनुसन्धान भइरहेको प्रहरीले जनाएको छ ।