कपिलवस्तु, २ जेठ । कपिलवस्तु बाणगंगा–४ की ६ वर्षीय बालिकाको सम्पर्कमा आएका कपिलवस्तु र काठमाडौं गरी ९१ जनालाई क्वारेन्टाइनमा राखिएको छ । बालिकाको सम्पर्कमा आएका कपिलवस्तुका ८ र काठमाडौंका ८३ जना गरी ९१ जनालाई क्वारेन्टाइनमा राखिएको छ । क्वारेन्टाइन बस्नेमा काठमाडौंमा बालिकाका सम्पर्कमा आएका ४९ स्वास्थ्यकर्मी र कुरुवा लगायत ३४ जना रहेका छन् ।
त्रिवि शिक्षण अस्पतालमा उपचाररत ६ वर्षीया बालिकामा कोभिड–१९ संक्रमण देखिएपछि उनको सम्पर्कमा आएका ४९ जना स्वास्थ्यकर्मीलाई क्वारेन्टाइनमा राखिएको छ । बालिका ३ दिनअघि घाँटीको शल्यक्रियाका लागि अस्पताल आएकी थिइन् । बिरामी उच्च जोखिमको क्षेत्रबाट आएकाले उनको स्वाबको नमुना पीसीआर परीक्षणका लागि अस्पतालले पठाएको थियो ।
अस्पतालको कोभिड–१९ व्यवस्थापन समितिका संयोजक डा. सन्तकुमार दासले बालिकाको सम्पर्कमा आएका ४९ जना स्वास्थ्यकर्मी, बिरामी र कुरुवासमेत गरी ८३ जनाको घाँटीको र्यालको नमुना पीसीआर परीक्षण गर्न संकलन गरिएको छ । ४९ जना स्वास्थ्यकर्मीको अहिले पीसीआर परीक्षण रिपोर्ट नेगेटिभ आए पनि दुई सातासम्म क्वारेन्टाइनमै राखिने छ ।
यता कपिलवस्तुमा बालिकाको सम्पर्कमा आएका क्वारेन्टाइनमा राखिएकाहरुको स्वाव संकलनका लागि पहल भइरहेको र जतिसक्दो चाडो स्वाव संकलन गरिने बाणगंगा नगरपालिकाका उप मेयर चक्र अर्यालले बताउनुभयो । बालिकाको सम्पर्कमा आएका ८ जनालाई गजेहडा मा.वि. स्थित क्वारेन्टाइनमा राखिएको अर्यालले जानकारी दिनुभयो । बैशाख २७ गते बालिका गएको दूधको ट्याङ्ककर र चालकलाई नियन्त्रणमा लिई क्वारेन्टाइनमा राखिएको छ भने गजेहडा स्थित ट्वीन्स डेरी पसल सिल गरिएको छ ।कपिलवस्तुमा कोरोनाका ३९ जना संक्रमित फेला परेका छन् ।
प्रतिक्रिया