कांग्रेस नेता बस्नेतको निधन

लमही, २ जेष्ठ । नेपाली कांग्रेसका नेता तथा प्रजातान्त्रिक योद्धा  तेजबहादुर बस्नेतको उपचारका क्रममा आज निधन भएको छ । लामो समयदेखि मिर्गौला रोगबाट पीडित उहाँको ६६ वर्षका उमेरमा  बिहान ७ बजे काठमाडौँमा निधन भएको छोरा दीपले जानकारी दिनुभयो । बस्नेत नियमित डायलायसिस गर्ने भएपछि काठमाडौँमा बस्दै आउनुभएको थियो । विद्यार्थीकालदेखि नै राजनीतिमा लाग्नुभएका बस्नेत प्रजातन्त्र प्राप्तिका लागि  लामो समय कारागार बस्नुभएको थियो ।  त्यागी नेता बस्नेत महासमिति सदस्य र क्षेत्रीय सभापतिसमेत हुनुभएको थियो ।

                उहाँले हेटौँडा सिमेन्ट कारखानाको कार्यसमिति सदस्यलगायत  विभिन्न  निकायमा रहेर काम गर्नुभएको थियो । उहाँको दाहसंस्कार दाङको  शीतलपुरघाटमा गरिने परिवारले जनाएको छ । बस्नेतको निधनप्रति  कांग्रेस दाङले दुःख व्यक्त गरेको छ । पार्टी जिल्ला सभापति कीर्तिबहादुर खड्काले उहाँको निधनले पार्टीलाई ठूलो क्षति पुगेको बताउनुभयो ।