नेपालको नयाँ नक्सा मिलाउन लोगो परिवर्तन हुने

काठमाडौँ ११ जेष्ठ ।  राष्ट्रिय सभाका सांसदले लगाउने लोगो परिवर्तन हुने भएको छ।नेपालको नयाँ नक्सा मिलाउन लोगो परिवर्तन गर्न लागिएको हो। सिंहदरबारमा बसेको राष्ट्रिय सभाको कार्यव्यवस्था परामर्श समिति बैठकले सांसदको लोगो नक्सा अनुसार परिमार्जन गर्ने निर्णय गरेको हो।संघीय संसद सचिवालयका सहायक प्रवक्ता दशरथ धमलाले सरकारले नेपालको परिवर्तित नक्सा राजपत्रमा प्रकाशन गरेपछि लोगोमा प्रयोग भएको नक्सा सोही अनुसार परिवर्तन गर्ने निर्णय गरिएको बताए। सांसदहरुले प्रयोग गर्ने लोगोमा नेपालको नक्सा र झण्डा रहेका छन्।त्यस्तै राष्ट्रिय सभाले संघीय संसदका सांसदहरुको लोगोमा एकरुपता ल्याउन पहल गर्ने निर्णय पनि गरेको छ।यसैबीच राष्ट्रिय सभाको १२ गते सोमबारका लागि डाकिएको बैठक १३ गते सम्मका लागि स्थगित भएको छ। मुस्लिम समुदायको पर्व इदमा सार्वजनिक बिदा भएका कारण बैठक सारिएको हो।