प्रदेश ५ : वजेट कोरोना नियन्त्रण र रोजगारी सिर्जनामा केन्द्रित हुने

दाङ असार १ । प्रदेश ५ सरकारले आगामी आर्थिक वर्ष ०७७\७८ को कोरोना नियन्त्रण र रोजगार कार्यक्रमलाई मुख्य प्राथमिकतामा राख्दै बजेट ल्याउने भएको छ । चालू आर्थिक वर्ष ३६ अर्ब ४२ करोड रुपैयाँको बजेट ल्याएको थियो । त्यसमध्ये ४१ दशमलव ६१ प्रतिशत ९१५ अर्ब १५ करोड० मात्र खर्च गर्न सकेको प्रदेश सरकारले त्यसकै हाराहारीमा बजेट ल्याउने तयारी गरेको छ ।

             संघीय सरकारले आगामी आवका लागि प्रदेश ५ लाई कुल १४ अर्ब ६ करोड ९६ लाख रुपैयाँ छुट्याएको छ । चालू आवमा यस्तो अनुदान १५ अर्ब ३१ करोड ५ लाख रुपैयाँ छुट्याएको थियो । संघीय अनुदान घटेकाले बजेट पनि घटेर आउने जनाइएको छ । उक्त बजेट प्रदेश सभाको सोमबारको बैठकमा आर्थिक मामिला तथा योजना मन्त्रालयको समेत जिम्मेवारी समालेका मुख्यमन्त्री शंकर पोखरेलले प्रस्तुत गर्ने कार्यक्रम छ । 

                प्रदेश सभाका सभामुख पूर्णबहादुर घर्तीले सोमबार तीन बजेका लागि बजेट वक्तव्य प्रस्तुत गर्ने कार्यसूची तय गरेका छन् । सरकारका प्रवक्तासमेत रहेका भौतिक पूर्वाधार विकासमन्त्री वैजनाथ चौधरीले यस वर्षको बजेटमा कृषि क्षेत्रदेखि अन्य क्षेत्रका विकास निर्माणका काममा रोजगारमूलक कार्यक्रमलाई बजेटमा प्राथमिकता दिइने जानकारी दिए ।

             प्रदेश सरकारले कोरोनासँगको लडाइँमा सफलता हासिल गरेपछि कृषि, पर्यटनलगायतका क्षेत्रको विकास गर्दै रोजगारी र आय आर्जन बढाउने कुरामा जोड दिँदै गत जेठ १० गते नीति कार्यक्रम प्रस्तुत गरेको थियो । बजेट विनियोजन गर्दा कोभिड–१९ नियन्त्रण, कृषि, रोजगारी वृद्धि, गरिबी निवारण, आय आर्जन र सार्वजनिक निर्माणमा विशेष जोड दिइने नीति कार्यक्रममा उल्लेख थियो ।