गण्डकी प्रदेशमा थपिए १८ जना, कोरोना संक्रमित २२३ पुगे

कास्की, २ असार ।  गण्डकी प्रदेशमा आज थप १८ जनामा कोरोना भाइरसको संक्रमण पुष्टि भएको छ । मंगलबार गण्डकी प्रदेश स्वास्थ्य निर्देशनालयले जारी गरेको बिज्ञप्ति अनुसार थप १८ जना कोरोना भाइरस संक्रमण पुष्टि भएसँगै गण्डकीमा संक्रमितको संख्या २२३ पुगेको हो ।

            निर्देशनालयका निर्देशक डा. विनोद विन्दु शर्माद्वारा हस्ताक्षरित विज्ञप्ती अनुसार गोरखाका १०, स्याङ्जाका ४, पूर्वी नवलपरासीमा २ तथा कास्की र बाग्लुङमा १–१ जना कोरोना संक्रमित पुष्टि भएका छन् । गोरखामा संक्रमण देखिएका १० जनामध्ये गोरखा नगरपालिकाका २१ देखि ५३ वर्ष उमेरका ७ पुरुष र ३१ वर्षीया एक महिला तथा बारपाक सुलिकोट गाउँपालिकाका ५३ र २५ वर्षका दुई जना पुरुष छन् ।

        कास्कीको पोखरा महानगरपालिकाका २१ वर्षीय पुरुष र बाग्लुङको ताराखोला गाउँपालिकाको ३४ वर्षीय पुरुषमा पनि कोरोना संक्रमण पुष्टि भएको छ ।  स्याङ्जाको चापाकोट नगरपालिकाका १८, ३५, ३९ र १८ वर्षका चार जना पुरुषमा कोरोना संक्रमण पुष्टि भएको छ ।

       पूर्वी नवलपरासीको विनय त्रिबेणी गाउँपालिका र मध्यविन्दु नगरपालिकाका एक–एक जनामा कोरोना भाइरस संक्रमण पुष्टि भएको छ । मंगलबार संक्रमण पुष्टि भएका सबै १८ जना भारतबाट फर्किएको जनाइएको छ ।