आज जननेता मदन भण्डारीको ६९ औँ जन्म जयन्ती

काठमाडौं, १४ असार । तत्कालीन नेकपा एमालेका महासचिव जननेता मदनकुमार भण्डारीको आज ६९ औँ जन्म जयन्ती देशभर मनाइँदैछ । नेपाली कम्युनिष्ट आन्दोलनको लोकतान्त्रिकरणका लागि जनताको बहुदलीय जनवाद (जबज) को सिद्धान्त प्रतिपादन गरी  भण्डारी जनतामाझ लोकप्रिय भएका थिए । भण्डारीको जन्म २००९ साल असार १४ गते ताप्लेजुङको ढुंगेसाँघुमा भएको थियो । 

        भण्डारीले २०४८ सालको महाधिवेशनमा पेश गरेको जबजको सिद्धान्तलाई तत्कालीन नेकपा एमालेले आफ्नो पार्टीको सिद्धान्त मार्गचित्रको रुपमा लागू गर्दै आएको थियो । तत्कालीन नेकपा (एमाले) का महासचिव भण्डारी र संगठन विभाग प्रमुख जीवराज आश्रितको २०५० जेठ ३ गते दासढुंगा भएको जिप दुर्घटनामा परी दुःखद निधन भएको थियो ।

        उनको दुर्घटनामा परी निधन भएको भन्दा नेपालीहरु विश्वास गर्दैनन् । उक्त घटनालाई लिएर विभिन्न थरिका कुराहरु आएपनि अहिलेसम्म यही नै भएको हो भनेर भन्ने अवस्था छैन ।

        यसैबीच जन्म जयन्तीको अवसरमा नेकपा अध्यक्ष तथा प्रधानमन्त्री केपी शर्मा ओलीले श्रद्धासुमनसहित मदनकै बाटोमा अघि बढ्ने प्रण गरेका छन् । सशस्त्र जनयुद्धको अनुभवपछि गत जेठ ३ गते भण्डारीको निधन भएको दिन एमाले र नेकपा (माओवादी केन्द्र)को एकता भई हालको नेकपा गठन भएको थियो ।