५ सय हेक्टरको मकैवाली नष्ट ,सितगंगा सबैभन्दा बढी प्रभावित

अर्घाखाँची २० असार ।कपिलवस्तु हुदै अर्घाखाँची प्रवेश गरेको सलहले र्घाखाँचीमा पाँच सय हेक्टरभन्दा बढी क्षेत्रफलमा लगाएको मकै बाली नष्ट गरेको छ । छ दिनदेखि सलहले खेतबारी नछाडेपछि स्थानीय हैरान भएका छन् । केहिदिन अघि थाल ठटाउँदै आगो बालेर सलह धपाउन लागि परे पनि सलह नभागेपछि कृषक चिन्तित भएका छन् । जिल्लाका केही भागमा सलह नियन्त्रणमा आए पनि शितगंगा नगरपालिकामा सलह नियन्त्रणमा आउन सकेको छैन । 

        शितगंगा नगरपालिका वडा नम्बर ७ को जलुके, जुवाकोट, लगायतका क्षेत्रमा लगाएको  मकै पूर्ण रुपमा नष्ट गरेको वडा अध्यक्ष मोहन पन्थीले जानकारी दिनु भयो । सलहले खेती खाएपछि वडाबासीहरु अत्यन्तै चिन्तित भएका छन् । सितगंगा १० सिद्धाराको दुम्सी लगायतका क्षेत्रमा पनि सलहले मकैबाली पूर्ण रुपमा नष्ट गरेको वडा अध्यक्ष हिम्मत पोख्रेलले वताउनु भयो । एक रोपनी क्षेत्रफलमा सामान्य पनि २ क्विनटल मकै उत्पादन हुन्छ । जिल्लाका सबै क्षेत्रमा गरी १० हजार रोपनी भन्दा बढी क्षेत्रफलमा लगाएको मकै पूर्ण रुपमा र केही भागमा सलहले आंशिक रुपमा क्षति पुर्याएको छ । 

    सन्धिखर्क नगरपालिका, शितगंगा नगरपालिका, भूमिकास्थान नगरपालिका, छत्रदेव गाउँपालिका, मालारानी गाउँपालिका र पाणिनि गाउँपालिका सबैतिर सलह देखिएको र यसले धेरै  क्षेत्रमा क्षती पु¥याएको कृषी ज्ञान केन्द्र अर्घाखाँचीका कृषि प्राविधिक निमबहादुर आचार्यले जानकारी दिनु भयो । मकै बाली लगायतका अन्य बालीमा क्षती पुगेको र  तथ्याङ्क संकलन गर्ने कार्य भैरहेको उहाँले वताउनु भयो ।