पाल्पा २९ असार । पछिल्लो एक महिनामा नेपालमा बाढी, पहिरो र डुवानका कारण ८५ जनाको मृत्यु भएको छ भने ४६ जना बेपत्ता भएका छन् । राष्ट्रिय विपद व्यवस्थापन प्राधिकरणका अनुसार जेठ ३१ गतेदेखि असार २९ गतेसम्म भएका बाढी, पहिरो र डुवानका घटनामा १५ भन्दा बढी जिल्ला प्रभावित भएका छन् । यस क्रममा ५० जना घाइते भएका छन् भने १३४ घर क्षति भएको छ । सबैभन्दा बढी मानवीय क्षति म्याग्दीमा भएको छ । असार २६ गतेको पहिरोले म्याग्दीमा २८ जनाको मृत्यु, ४ जना बेपत्ता र १२ जना घाइते भएका छन् ।
पहिरोका कारण ३७ घर प्रभावित भएको छ । प्राधिकरणका अधिकारीले सोमबार प्रतिनिधिसभाको राज्य व्यवस्था तथा सुशासन समितिमा यस्तो जानकारी दिएको हो । अन्य जिल्लामा पनि मृत्यु, वेपत्ता र क्षती भएको जनाएको छ । बाढी र पहिरोका कारण पछिल्लो एक हप्तामा बढी क्षति भएको छ । अत्यधिक वर्षा भएका कारण जनधनको क्षति बढी भएको प्राधिकरणका प्रमुख कार्यकारी अधिकृत अनिल पोखरेलले जानकारी दिनु भयो ।
यता सिद्धार्थ राजमार्गअन्तरगत बुटवल तानसेन सडक खण्डको पाल्पाको तिनाउ गाउँपालिका दोभानमा पहिरो खस्दा सडक अवरुद्ध भएको छ । प्रदेश ५ ट्राफिक प्रहरी कार्यालय बुटवलका अनुसार दोभानको प्रहरी चौकीनजिकै पहिरो खसेर सडक अवरुद्ध भएको छ । सडक नै ढाकिने गरी पहिरो खसेको प्रहरीले जनाएको छ । सो सडकखण्डमा गुड्ने गाडी अलपत्र परेका छन ्। पहिरो हटाउने प्रयास भैरहेको प्रहरीले जनाएको छ ।
प्रतिक्रिया