आज साउने सङ्क्रान्ति यस्तो छ धार्मिक महत्व

काठमाडौं, १ साउन । आज साउने संक्रान्ति देशभर विशेष रुपमा मनाइदै छ । सूर्यले मिथुन राशिको भोग पूरा गरी कर्कट राशिमा प्रवेश गर्ने पहिलो दिनको रुपमा देशभर आज साउने सङ्क्रान्तिका रुपमा मनाइँदैछ । साउनदेखि नै सूर्य दक्षिण हुँदै हिँड्ने भएकाले आजैदेखि दक्षिणायन शुरु हुन्छ । माघ १ गते शुरु हुने उत्तरायण र साउन १ गते शुरु हुने दक्षिणायन शुरु हुने दिनलाई विशेष रुपमा मनाइन्छ ।

        यसवर्ष कोरोना भाइरसको सङ्क्रमणका कारण धेरैले घरमै परिवारका सदस्यबीच रमाइलो गरी यो पर्व मनाउँदै छन् । आजको दिन साउन १ गते आफन्तका साथ जम्मा भई रमाइलो गरेर मनाउँछन् । परम्परानुसार कागभलायो, कुकरडाइनो, लुतेझार, पानीअमला, कागती, अम्बा, नासपाती आदि औषधिका रुपमा समेत प्रयोग हुने वनस्पति राखेर कण्डारक नाम गरेका राक्षसको पूजा गरी अगुल्टो समेत फाल्ने प्रचलन रहेको छ । लुतो फाल्दा आ–आफ्नो कुल परम्परानुसार नाङ्लो ठटाउने, शङ्ख फुक्ने, घण्ट बजाउने, ढोका बन्द गर्ने चलन  छ । साउन महिनालाई विशेषरुपमा भगवान् शिवको पूजा गरेर मनाइन्छ । महिलाले हरियो चुरा,  कपडा, मेहन्दी लगाएर प्रकृतिसँग नजिक भएको देखाउने गर्दछन्  ।

        नेपालीहरु खेती किसानीमा लाग्ने र असार महिनाभर कृषिमा  व्यस्त हुने र हिलो मैलोले लाग्ने छालासम्बन्धी रोग ठीक गर्न लुतो फाल्ने गरिएको धर्मशास्त्रविद् एवं नेपाल पञ्चाङ्ग निर्णायक समितिका अध्यक्ष प्रा डा रामचन्द्र गौतमले बताउनभुयो । साउन महिनाभर देशभरका शिवालय विशेषगरी पशुपतिनाथ मन्दिरमा भक्तजनको विशेष भीड लाग्छ । साउन महिना शिवजीको र सोमबारलाई शिवको बार भनिन्छ । साउन महिना एवं सोमबार शिवालयमा भक्तजनको विशेष पूजा गर्ने गर्दछन् ।