हत्यामा संलग्न रहेको आरोपमा एक महिलालाई काठमाडौं ल्याइयो

काठमाडौं २७ साउन । काठमाडौंको गोंगबुमा आइतवार भएको विभत्स हत्यामा संलग्न रहेको आरोप लागेकी महिलालाई प्रहरीले चितवनबाट काठमाडौं ल्याएको छ ।दाङका कृष्ण बहादुर बोहोराको हत्या आरोपमा कल्पना शाही नाम गरेकी महिला र उनकी छोरीलाई मंगलबार बिहान तीन बजे काठमाडौं ल्याइएको प्रहरी स्रोतले जानकारी दिएको छ ।दुबै जनालाई प्रहरीले सोमबार चितवनको टाँडी, माधवपुरबाट पक्राउ गरेको थियो ।

        उनीहरुलाई मंगलबार बिहान प्रहरीले गोंगबुस्थित हत्या गरिएको घरमै लगेर बयान लिएको छ ।प्रारम्भिक बयानका क्रममा ती महिलाले हत्या गरेको स्विकारेको बताइएको छ । हत्या गरिएका दाङका बोहोरासँग उनको के कस्तो सम्बन्ध थियो भन्नेबारे केही खुलाइएको छैन ।गोंगबुको गणेशस्थान नजिकै आइतबार बिहान टाउको र शरीर अलग गरेर सुटकेसमा फालिएको अवस्थामा शव भेटिएको थियो ।सोमबार अपरान्ह मात्रै मृतकको पहिचान खुलेको थियो । सुटकेस भेटिएको स्थानभन्दा करिब सय मिटरको दूरीमा रहेको एक घरको तेस्रो तलामा बोहराको हत्या भएको प्रहरीको दाबी छ ।