प्रदेश ५ : छोटो समय मै थपिए १००० संक्रमित,साढे ४ हजार डिस्चार्ज

बुटवल ७ भदौ ।प्रदेश ५ मा साउन २३ गतेको तथ्यांकअनुसार कुल संक्रमितको संख्या ४ हजार ४ सय ९९ थियो । प्रदेश स्वास्थ्य निर्देशनालयको पछिल्लो तथ्यांकअनुसार शनिबार सम्म कुल संक्रमितको संख्या ५ हजार ४ सय ९८ पुगेको छ । १५ दिनको अन्तरमा मात्र प्रदेश ५ मा संक्रमितको संख्या झण्डै हजारले बढेको देखिएको छ । कुल संक्रमित मध्ये अहिले १ हजार १ सय १५ जना आइसोलेसनमा रहेका छन् । ४ हजार ३ सय ६२ जना उपचारपछि घर फर्केका छन । पछिल्लो १५ दिनमा सक्रिय संक्रमित मात्र तेब्बर भन्दा बढी पुगेका छन । गत साउन २३ गते प्रदेशमा सक्रिय संक्रमित ३ सय ३३ जना मात्र थिए । 

        अहिले बढेर १ हजार १ सय १२ पुगेका छन । १५ दिनकै बीचमा थप १० जनाको मृत्यु भई कोरोना संक्रमणबाट मृत्यु हुनेको संख्या प्रदेश ५ मा २३ पुगेको छ । आइतबार मात्रै रुपन्देहीका २ जनाको मृत्यु भएको छ । सुरुवाती समयमा भारतबाट फर्केर आएका नेपालीमा मात्र संक्रमण देखिएको थियो । कोरोना संक्रमित भएका उनीहरु धेरैजना निको भएर घर फर्किसकेका छन् । तर, लकडाउन खुलेलगत्तै भएको चहलपहल र लापरबाहीले समुदायमा संक्रमण फैलियो । अहिले देखिएका अधिकांश संक्रमित समुदायकै हुन्, जो विदेशबाट आएका थिएनन् । उनीहरुमा नेपालमै असुरक्षित आनीबानी र व्यवहारका कारण संक्रमण फैलिएको हो ।