रुपन्देहीका संक्रमितको भीम अस्पतालमा मृत्यु

बुटवल ९ भदौ । रुपन्देहीमा एक कोरोना संक्रमित पुरुषको मृत्यु भएको छ । घरको छतबाट लडेर घाइते भएका गैडहवा गाउँपालिका– ३ का ५५ वर्षिया उनको  युनिभर्सल मेडिकल कलेजमा उपचारका क्रममा ४ दिनअघि परीक्षण गर्दा कोरोना संक्रमण पुष्टि भएको थियो । टाउकोमा रगत जमेका कारण शल्यक्रिया गर्नका लागि उनको पीसीआर परीक्षण गरिएको थियो । कोरोना पोजेटिभ देखिएपछि मेडिकल कलेजले डिस्जार्चका लागि दवाव दिएकाले उनलाई भीम अस्पतालमा भर्ना गरिएको परिवारका सदस्यले बताएका छन् । उनको सोमबार राति भीम अस्पतालमा मृत्यु भएको हो ।गैडहवा गाउँपालिकाका प्रमुख प्रशासकीय अधिकृत चिरञ्जीवि घिमिरेले उनको मृत्यु भएको पुष्टि गरेका छन् । योसंगै रुपन्देहीमा कोरोना संक्रमितको मृत्यु हुने संख्या ६ पुगेको छ ।