किसानलाई ५० प्रतिशत बीउ अनुदान

सन्धिखर्क १५ असोज  ।अर्घाखाँचीको सन्धिखर्क नगरपालिकाले कृषकलाई उन्नत जातका तरकारीको वीउ वितरण गर्न सुरु गरेको छ । कृषकहरुको मागको आधारमा ५० प्रतिशत अनुदानमा बन्दा, फूल काउली, ब्रो काउली, प्याज र केराउको वीउ वितरण गर्न सुरु गरिएको कृषि शाखा प्रमुख राजेन्द्र भट्टराईले जानकारी दिनुभएको छ । कृषकलाई वीउ हस्तान्तरण गर्दै सन्धिखर्क नगरपालिकाका नगर प्रमुख कमल प्रसाद भुसालले कृषिको विकासबिना आर्थिक समृद्धि नहुने भएकाले तरकारीको वीउ वितरण गरेको बताउनुभयो ।

    उहाले उत्पादन गर्ने कृषकलाई नगरपालिकाले सहयोग गर्न कुनै कसुर बाँकी नराख्ने बताउनुभयो । सन्धिखर्क नगरपालिकाका नगर उपप्रमुख ठाकुर कुमार विकले कषि पेशालाई निर्वाहमुखीबाट व्यवसायिक बनाउन सबैलाई आग्रह गर्नुभएको छ । कार्यक्रम कृषि शाखा प्रमुख राजेन्द्र भट्टराईको सञ्चालनमा सम्पन्न भएको हो ।