आज कांग्रेसको देशैभर प्रदर्शन कुन जिल्लामा को नेता हेर्नुहोस सूची सहित

कपिलवस्तु २९ मंसिर । सरकारको कामप्रति असन्तुष्टि जनाउदै प्रमुख प्रतिपक्षी दल नेपाली कांग्रेसले आज (सोमबार) देशभर विरोध प्रदर्शन गर्दैछ ।आफ्नो गृह जिल्ला तनहुँमा गत मंसिर १७ गते पुल उद्घाटन गर्न पुग्दा प्रहरी प्रशासनले रोक लगाएर वरिष्ठ नेता रामचन्द्र पौडेललाई प्रहरी हिरासतमा समेत लिएपछि आक्रोशित बनेको कांग्रेसले सोमबार सरकारविरुद्ध देशैभरी प्रदर्शन गर्न लागेको हो ।ओली नेतृत्वको नेकपा सरकार कोरोना महामारी नियन्त्रण गर्न नसकेको, प्रधानमन्त्री स्वयम भ्रष्टाचारीको संरक्षणमा लागिपरेको, जनताको स्वास्थ्य सुरक्षामाथि खेलबाड गरेको आरोप पनि कांग्रेसले लगाइरहेको छ ।

    पछिल्लो समय राजावादीहरूले देशका विभिन्न शहरमा प्रदर्शन गरेपछि झस्किएको कांग्रेसले संघीय लोकतान्त्रिक गणतन्त्रका पक्षमा नारा लगाउन विभिन्न नारा पनि तय गरेको छ । नारामा ‘चारैतिर भ्रष्टाचार, जनताले चिन्यो ओली सरकार, जनता कोरोनाको मारमा नेकपा सत्ताको जित–हारमा, औषधि छैन मल छैन, सत्ताको लडाइँ, लाज छैन, बढ्यो महिला हिंसा र बलात्कार, अकर्मण्य भो ओली सरकार’ जस्ता विषय समेटिएका छन् ।

    कांग्रेसले कोरोना संक्रमण फैलिन नदिन भौतिक दूरी कायम गर्दै मास्क लगाएर सडक प्रदर्शन गर्न कार्यकर्तालाई निर्देशन दिएको छ । कोरोनाका कारण भन्दै कांग्रेसले औपचारिक रूपमा कुनै पनि जिल्लामा प्रतिनिधि पठाएको छैन । तर, शीर्ष नेता र अधिकांश केन्द्रीय सदस्य जिल्ला–जिल्लामा पुगेका छन् ।

    सभापति देउवाले हेटौंडामा हुने विरोध प्रदर्शनलाई सम्बोधन गर्नेछन् । यस्तै उपसभापति विमलेन्द्र निधि भक्तपुर, महामन्त्री शशांक कोइराला विराटनगर, कोषाध्यक्ष सीतादेवी यादवले ललितपुरको कार्यक्रमको नेतृत्व गर्नेछन् ।सहमहामन्त्री प्रकाशशरण महत झापा, पूर्व उपसभापति गोपालमान श्रेष्ठ काभ्रे, पूर्व महामन्त्री प्रकाशमान सिंह धनुषा पुग्दा नेताहरू चित्रलेखा यादव सप्तरी, रामशरण महत चितवन र अर्जुननरसिंह केसी पोखरामा हुने कार्यक्रममा सहभागी हुने जनाइएको छ ।

    यस्तै केन्द्रीय सदस्यहरू गगन थापा कैलाली, प्रदीप पौडेल कञ्चनपुर, एनपी साउदले अछामबाट सरकारले गरेका जनविरोधी कामविरुद्ध शंखघोष गर्ने कांग्रेसले जनाएको छ ।यता कपिलवस्तुमा भने कांग्रेसका केन्द्रिय नेताहरु अत्तहर कमाल मुसलमान र अभिशेष प्रताप शाह रहेकाले वाहिरवाट कसैलाई खटाइएकोछैन । आजको सभामा भने मुख्यबक्ता अत्तहर कमाल मुसलमान , विशेष बक्तामा अभिशेष प्रताप शाह र राजेश सिंह रहेको कांग्रेसका यूवा नेता राजेश ज्ञवालीले प्रेसपाटीलाई जानकारी दिनु भयो ।