बर्दिया ६ पुष । बर्दिया राष्ट्रिय निकुञ्जमा गएराति निकुञ्ज सुरक्षार्थ खटिएको नेपाली सेना र सिकारीबीच गोली हानाहान भएको छ । निकुञ्जको खयर भट्टीमा ५\६ जनाको समूहमा रहेका सिकारी र निकुञ्ज सुरक्षाका लागि खटिएका नेपाली सेनाबीच गोली हानाहान भएको बर्दिया निकुञ्जका सहायक संरक्षण अधिकृत अशिम थापाले जानकारी दिनुभयो ।बर्दिया राष्ट्रिय निकुञ्जको खयरभट्टी पोष्टबाट झण्डै ६ किलोमिटर उत्तरपश्चिम निकुञ्जको कोर इलाकामा पर्ने गिठ्ठे खोला नजिक निकुञ्जका कर्मचारीसहित नेपाली सेनाको संयुक्त गस्ती टोली र हतियारधारी सिकारीहरुसँग मुठभेड हुँदा दोहोरो फायरिङ भएको निकुञ्जले जनाएको छ ।
निकुञ्जको नियमित गस्तीका क्रममा रहेका बेला सिकारीहरु वन्यजन्तुको मासु भाग लगाएर प्याक गर्दै गरेको अवस्थामा फेला पारेको सहायक संरक्षण अधिकृत असिम थापाले बताउनुभयो । ‘सिकारीहरु बन्दुकसहित थिए, सेनालाई देख्नासाथ उनीहरुले गोली चलाए, सेनाले पनि जवाफमा गोली चलायो, उनीहरु भागे’ ( थापाले भन्नुभयो । निकुञ्जको टोलीले तत्काल खोजी गर्दै जाने क्रममा दुई जनालाई पक्राउ गरेको छ । पक्राउ पर्नेमा सुर्खेत बराहाताल गाउँपालिका वडा नम्बर ३ नरसिंहकाँडाका ३४ वर्षका चक्रबहादुर विष्ट र त्यही ठाउँका २४ वर्षका गणेश तिवारी रहेका छन् ।
बर्दिया राष्ट्रिय निकुञ्जका सहायक संरक्षण अधिकृत अशिमकुमार थापाका अनुसार उनीहरुको साथबाट भरुवा बन्दुक ३ थान, गोली १७ थान, बारुद २०० ग्राम, हँसिया ५ थान, गुलेली १, जाल १, वन्यजन्तुको सुकुटी अन्दाजी ७० किलो, बन्दोबस्तीको सामानलगायतका सामाग्री बरामद गरिएको छ । फरार रहेका शिकारीलाई पक्राउ गर्न खोजी कार्य भइरहेको छ ।निकुञ्जका कर्मचारीसहित निकुञ्ज सुरक्षार्थ नेपाली सेनालाई देख्न साथ सिकारीहरुले गोली प्रहार गरेपछि सेनाले पनि जवाफी फायर गरेको हो । दुवैतर्फ फायरिङ भएपनि कुनै मानवीय क्षति नभएको निकुञ्जको भनाइ छ ।
प्रतिक्रिया