आर्थिक विपन्न परिवारलाई जाडोबाट बचाउन कपडा बैंकको स्थापना

कपिलवस्तु ९ पुष । चिसो बढेसंगै राष्ट्रका लागि युथ युनिटि वेलफेयर एसोसियन ‘युवा’ कपिलवस्तुले कपडा बैंक स्थापना गरेको छ । “हुनेले दिएर जाऔँ, नहुनुले लिएर जाऔँ ” भन्ने मुल नाराका साथ आर्थिक रुपमा विपन्न परिवारलाई जाडोबाट बचाउने उद्देश्यले कपडा बैंकको स्थापना गरिएको युवाका संयोजक लक्ष्मण सापकोटाले जानकारी दिनु भयो ।

चिसो बढेसंगै जाडोमा शरिर समेत ढाक्न नसक्ने गरीब परिवारलाई शरीर ढाक्ने एक जोर कपडा भएपनि प्रदान गरी उनीहरुको घाउमा मलम लगाउने लक्ष्यका साथ सुरु गर्न लागिएको अभियानमा ईच्छुक संघ संस्था वा व्यक्तिलाई पनि समावेश गराईनेछ । खासगरी प्रयोग गर्न मिल्ने खालका कपडा सफा गरि विपन्नलाई प्रदान गर्ने, प्रयोग गर्न नमिल्ने कपडालाई कपास उद्योगमा लगि सिरक, डसना बनाई वितरण गरिने अभियानको थालनि गरेको संस्था युवा कपिलवस्तुले जनाएको छ ।

यसै क्रममा वुधवार वाणगंगा ८ सुकुम्बासी बस्तीमा गरीबहरुलाई जाडोका कपडा बितरण गरिएको छ  । युवाका सहसंयोजक पशुपति गिरी , सरोज घिमिरे , मधुुसुदन भुषाल लगायतको  अगुवाईमा गरीबहरुलाई न्यानो कपडा बितरण गरिएको थियो  । सुकुम्बासी बस्तीमा गएर ३ परिवारलाई सुइटर , जकेट , चोला लगायतका न्याना कपडा वितरण गरिएको गिरीले जानकारी दिनु भयो । न्यानो कपडा पाए पछि मुस्लिम  परिवार  खुशी भएका थिए । 

अहिले कपिलवस्तु जिल्लाको बाणगंगा नगरपालिकामा सुरु गरिएको कपडा बैंक अभियान क्रमशः जिल्लाका अन्य स्थानीय तह तथा अन्य जिल्लामा पनि सञ्चालन गरिने छ ।राष्ट्रका लागि युथ युनिटि वेलफेयर एसोसियन ‘युवा’ कपिलवस्तुले कपडा बैंक स्थापनातपाईको सानो सहयोगले, कसैको घरमा न्यानो ल्याउन सक्छ भन्ने मुल मन्त्रका साथ अगाडि बढेको उक्त अभियानमा हुनेले दिन र नहुनेले लिन सक्ने छन् ।

जसका लागि चार नम्बर जितपुरमा रहेको बुद्ध प्रोफेशनल एकेडेमीमा सम्पर्क गर्न सकिनेछ भने ०७६५५०८६, ९८६७५२६९६६ वा ९८६२२७०२६३ मा सम्पर्क गरिने सक्ने युथ युनिटि वेलफेयर एसोसियन ‘युवा’ कपिलवस्तुले जनाएको छ । संस्थाले यस अघि राष्ट्रिय झण्डा दिवसको अवसरमा देश प्रति गर्व गर्दै जिल्ला प्रशासन अगाडि नयाँ झण्डा राख्ने लगायतका विभिन्न कार्यहरु गर्दै आईरहेको छ ।