प्युठानमा गाडी दुर्घटना हुँदा एक जनाको घटनास्थलमै मृत्यु

दाङ २३ माघ ।प्युठानमा शुक्रबार बिहान गाडी दुर्घटना हुँदा एक जनाको घटनास्थलमै मृत्यु भएको छ भने थप दश जना घाइते भएका छन् । जिल्ला प्रहरी कार्यालय प्युठानका प्रमुख डिएसपी सुनिल मल्लले दुर्घटनामा परी अर्घाखाँची जिल्लाको सितगंगा नगरपालिका वडा नं। ८ का ४२ वर्षीय टंकबहादुर बुढाको घटनास्थलमै मृत्यु भएको बताए ।दुर्घटनामा परी चालक प्युठान जिल्लाको सरुमारानी गाउँपालिकाका दशरथ विश्वकर्मा गम्भीर घाइते भएका छन् । उनलाई थप उपचारको लागि बुटवल रिफर गरिएको डिएसपी मल्लले बताए ।

दुर्घटनाका अन्य थप ९ जना घाइतेहरूको जिल्ला अस्पताल बिजुवारमा उपचार भइरहेको डिएसपी मल्लले जानकारी दिए ।दाङको भालुबाङबाट रोल्पा जिल्लाको सुलिचौरतर्फ जाँदै गरेको रा १ ज ८०९ नम्बरको भाडाको स्कार्पियो बिहान साढे ९ बजेतिर प्युठान जिल्लाको सरुमारानी गाउँपालिका वडा नं। ६ मोतिपुरमा दुर्घटनमा परेको थियो । डिएसपी मल्लका अनुसार घाइते यात्रुहरूले गाडीको ब्रेक फेल भएर दुर्घटना भएको जानकारी दिए। स्कार्पियो सडकदेखि झन्डै ५० मिटर तल खसेको प्रहरीले जनाएको छ।