कोरोना संक्रमित बढेपछि बैशाख सम्म बिद्यालय बन्द

कपिलवस्तु १२ बैशाख ।शिवराज नगरपालिकाले बैशाख मसान्तसम्मका लागि शैक्षिक संस्था बन्द गरेको छ । सम्पूर्ण विद्यालयको प्रत्यक्ष पठनपाठन र वार्षिक परीक्षा स्थगन गर्ने निर्णय गरेको हो । कोभिड १९ को प्रभावले बढ्दो असहज परिस्थितिलाई मध्यनजर गर्दै शिवराज नगरपालिका आधारभूत तह उत्तीर्ण परीक्षा समितिको आकस्मिक बैठकले सो निर्णय गरेको हो । 

बैठकले यही वैशाख १५ देखि संचालन हुने विद्यालय स्तरीय वार्षिक परीक्षा र वैशाख २४ गतेदेखि संचालन हुने नगरस्तरीय आधारभूत तह उत्तीर्ण परीक्षा स्थगन गरि आगामी जेष्ठ २ गतेदेखि संचालन गर्ने निर्णय गरेको छ ।यस्तै नियमित प्रत्यक्ष सिकाइलाई स्थगित गरि बैकल्पिक माध्यमद्वारा शिक्षण सिकाइ सहजीकरण गर्न नगरका सम्पूर्ण विद्यालयलाई निर्देशन दिने निर्णय भएको शिक्षा शाखा प्रमुख लोकराज पन्थीले जानकारी दिए ।

 विद्यालयको कार्यालय भने स्वास्थ्य सुरक्षाको मापदण्ड अपनाई नियमित संचालन गर्नुपर्ने शिक्षा शाखा प्रमुख पन्थीले बताए । नगरप्रमुख नेत्रराज अधिकारीको अध्यक्षतामा बसेको बैठकमा इलाका प्रशासन कार्यालय चन्द्रौटा नेत्र प्रसाद शर्मा, प्रमुख प्रशासकीय अधिकृत गणेश प्रसाद अर्याल, वडा प्रहरी कार्यालय चन्द्रौटाका प्रहरी निरीक्षक शंकर प्रसाद आचार्य, शिक्षा सम्बन्धी विभिन्न पेसागत संघसंगठनका प्रतिनिधिहरूको उपस्थिति रहेको थियो । उता बाणगंगा नगरपालिकाले भने बार्षिक परिक्षा पछि बिदालय बन्द गर्ने निर्णय गरेको छ । हाटबजार भने बन्द गर्ने निर्णय गरिएको छ ।