कपिलवस्तु १५ बैशाख ।कपिलवस्तुको बुद्धभुमी नगरपालिका ६ मा स्मार्ट कृषि गाउँ कार्यक्रम लागु भएको छ । भैसी पालक कृषकलाई सहयोग गर्ने उद्धेश्यले महुवा, पण्डितपुर र सेमरना गाउँलाई लक्षित गरी कार्यक्रम लागु भएको छ । कार्यक्रमबाट ८५ घर परिवारका ४ सय ५६ जना कृषक लाभान्वित हुने बुद्धभुमी ६ का वडा अध्यक्ष नन्दलाल यादवले बताए ।
चालु आ.व.मा लुम्बिनी प्रदेश सरकारको तर्फ बाट ४० लाख र समुदायको तर्फ बाट १३ लाख १५ हजार खर्च गरिने छ । कार्यक्रम अन्र्तगत यस वर्ष २० कृषकका भैसी गोठ सुधार, भैसीलाई पानी खुवाउन १० ह्ण्डपम्प, घाँस खेतीका लागी १२ स्यालो ट्युववेल जडान गरिने कार्यक्रमका सहजकर्ता रामलखन यादवले बताए । कार्यक्रम लागु भए पछि भैसी गोठ सुधार हने अपेक्षा गरिएको छ । सरकारको सहयोग नहँदा यहाका कृषकले कच्ची गोठमा भैसी पालन गर्दै आएका थिए ।
यादव समुदायको बसोवास भएको यस क्षेत्रमा मुख्य पेसाको रुपमा भैसी पालन र तरकारी तथा खाद्यान्न खेती गर्ने गरिन्छ । गोठ सुधारका लागि ७०/३० साझेदारीमा प्रदेश सरकारको तर्फबाट १ लाख ३५ हजार सहयोग गरिने कार्यक्रमका अध्यक्ष बंशीधर यादवले भने । कार्यक्रम अन्तर्गत जलवायु , सिँचाई, प्रविधि मैत्री र बजार व्यवस्थापनमा सुधार हुने बताइएको छ । प्रविधि मैत्री बनाउनका लागि कम्प्युटर सहयोग भएको छ । न्युनतम ५ भैसी भएको कृषकलाई कार्यक्रममा समावेस गराइएको छ ।
प्रतिक्रिया