अस्पताललाई सिघ्र खरिद गर्न मुख्यमन्त्रीको आग्रह,सहजीकरण र अनुगमनको जिम्मा मन्त्रालयलाई

रुपन्देही १६ जेठ । सिघ्र निर्णय प्रकृयावाट उपचारमा प्रयोग हुने यन्त्र उपकरण र  सामाग्री खरिद गर्न प्रदेश सरकारले अस्पताल प्रशासनहरुलाई निर्देशन दिएको छ । लुम्बिनी प्रदेश सरकारले श्रोत अस्पतालहरुलाई एचडीयू, आईसीयू र भेन्टिलेटर विस्तारको लागि तत्काल खरिद प्रक्रिया अगाडि बढाउन निर्देशीत गरेको हो  ।स्रोत सुनिश्चितता भएका अस्पतालहरुले अक्सिजन प्लान्ट स्थापनाका लागि प्रक्रिया अघि बढाउन आग्रह गर्दै आवश्यक सहजीकरण तथा अनुगमनका लागि प्रदेश स्वास्थ्य तथा जनसंख्या मन्त्रालयलाई जिम्मेवारी दिएको छ ।

मुख्यमन्त्री शंकर पोखरेल संयोजक रहेको लुम्बिनी प्रदेश कोरोना संकट व्यवस्थापन समितिको बैठकले स्वास्थ्य सामग्रीको खरिदका लागि संघ तथा प्रदेश स्वास्थ्स्य मन्त्रालयसँग समन्वय गरी सम्बन्धित अस्पतालहरुले तत्काल खरिद प्रक्रिया अगाडि बढाउन निर्देशीत  गरेको मुख्यमन्त्रीका प्रेस सल्लाहकार शेरबहादुर केसीले बताएका छन्  ।

बैठकले राप्ती प्रादेशिक अस्पतालमा पीसीआर ल्याब स्थापन गर्ने निर्णय गरेको छ । यसैगरी राप्ती स्वास्थ्य विज्ञान प्रतिष्ठान, दाङ्गले नजिकका पहाडी जिल्लाका लागि निःशुल्क पीसीआर परीक्षण गर्ने व्यवस्था मिलाउने निर्णय पनि भएको छ ।बैठकले कोभिड–१९ नियन्त्रण तथा चेन ब्रेकको लागि निषेधाज्ञालाई थप प्रभावकारी बनाउने निर्णय गरेको छ । निषेधाज्ञा हटाउनु पर्ने भएमा सम्बन्धित जिल्लाले प्रदेश सरकारसँग समन्वय गर्नु पर्ने निर्णय गरेको छ ।

बैठकले स्वाव संकलन गर्न चाहिने भिटिएम लगायतका सामग्रीको अपर्याप्तता भए जिल्ला स्थित स्वास्थ्य कार्यालयले प्रदेश सरकार लगायतबाट प्राप्त बजेट श्रोतबाट खरिद गर्ने व्यवस्था मिलाउने, स्वाव संकलन गरी पीसीआर परीक्षणको लागि नजिकको जिल्लामा रहेको ल्याबबाट परीक्षण गर्ने र सोको समन्वय सम्बन्धित प्रमुख जिल्ला अधिकारीले मिलाउने लगायतका निर्णय गरेको सल्लाहकार केसीको भनाइछ ।