काठमाडौं, २४ साउन । जनता समाजवादी पार्टी, नेपाल (जसपा) अध्यक्ष महन्थ ठाकुर र वरिष्ठ नेता राजेन्द्र महतो पक्ष जिल्ला दौडाहामा लागेका छन् । जिल्ला–जिल्ला पुगेर अर्का अध्यक्ष उपेन्द्र यादवको ‘भण्डाफोर गर्ने कार्यक्रम’ ठाकुर–महतो पक्षको छ ।सो पक्षले शुक्रबार एकै दिन मधेसका चार जिल्लामा विस्तारित बैठक समेत ग¥यो । जहाँ ठाकुर–महतो पक्षका शीर्षनेताले सम्बोधन गरेका छन् ।
निर्वाचन आयोगबाट अध्यक्ष यादव पक्षले आधिकारिकता पाएपछि ठाकुर–महतो पक्ष संगठन निर्माणका साथै ‘यादवको अवसरवादी चरित्र भण्डाफोर गर्न’ भन्दै जिल्ला दौडाहामा लागेका हुन् ।यसै क्रममा आज तौलिहवामा भण्डाफोर अभियान हुने भएको छ । अभियानमा सर्बेन्द्र नाथ शुक्ला सहितका नेताहरुले संवोधन गर्ने कार्यक्रम रहेको सो समुहका नेता अकवाल अहमद शाहले प्रेसपाटीलाई जानकारी दिनु भयो ।
कपिलवस्तु तत्कालीन रुपमा राजपाको पकड क्षेत्र रहेकाले ठाकुर महतो समुहको संगठन उपेन्द्र यादवको तुलनामा मजवुत रहने आकलन गरिएको छ । जसपा कार्यकारिणी समिति सदस्य केशव झाका अनुसार बारा, सप्तरी, सिराहा र महोत्तरीमा एकै दिन विस्तारित बैठक सम्पन्न भएको छ । बारामा जसपा नेता लक्ष्मणलाल कर्ण, जितेन्द्र सोनल, बाबुलाल साह र रमेश पटेलले सम्बोधन गरेका छन् ।
सप्तरीमा वरिष्ठ नेता महतो, केशव झा, बृषेशचन्द्र लाल र राजिव झा, सिराहामा अनिल झा, डा। सुरेन्द्र झा, उमाशंकर अरगरिया र जयनुल राईन तथा महोत्तरीमा अध्यक्ष ठाकुर, शरतसिंह भण्डारी र निर्जला राउतले बिशेष सम्बोधन गरेका छन् ।
प्रतिक्रिया