काठमाडौं ६ भदौ । नेकपा माओवादी केन्द्रले कम्युनिस्ट केन्द्र बनाउन एकता वार्ता थाल्ने निर्णय गरेको छ ।माओवादी केन्द्रले कम्युनिष्ट क्रान्तिकारी शक्तिसँग एकता र ध्रुवीकरण गर्ने भएको छ ।स्थायी कमिटी बैठकले पार्टीलाई व्यवस्थित र संस्थागत गर्दै अन्य पार्टीसँग एकताका लागि वार्ता तथा पहल गर्न आवश्यक प्रक्रिया अगाडि बढाउने निर्णय गरेको हो ।
पार्टी कार्यालय पेरिसडाँडामा शनिबार र आइतबार बसेको स्थायी कमिटी बैठकमा क्रान्तिकारी धाराका सबैलाई एकै केन्द्रमा ल्याउने गरी पहल गर्ने निर्णय भएको नेता नारायणकाजी श्रेष्ठले जानकारी दिए ।‘कम्युनिष्ट क्रान्तिकारी शक्तिसँग एकता र ध्रुवीकरणका लागि वार्ता तथा पहल गर्न आवश्यक प्रक्रिया अगाडि बढाउने निर्णय गरेको छ’, नेता श्रेष्ठले भने ।
‘कम्युनिस्ट आन्दोलनमा देखा परेका, देश र जनताको पक्षमा एउटा वा अर्को रुपमा उभिएका र समाजवादको पक्षमा रहेका सबैसँग हामी वार्ता गर्छौं’, उनले भने ।यस्तै बैठकले हालै बसेको केन्द्रीय कमिटीले स्थायी कमिटीलाई दिएको जिम्मेवारी पूरा गर्नेबारे छलफल पनि गरेको थियो ।
राष्ट्रिय सम्मेलनलाई केन्द्रमा राखेर वडा, पालिका र प्रदेश अधिवेशन गर्ने पनि निर्णय भएको छ । पार्टी निर्वाचन समितिले निर्वाचन नियमावली र निर्देशिका तयार पार्ने काम गरेको र उक्त निर्देशिका पार्टीका तल्ला कमिटीमा पठाइने नेता श्रेष्ठले बताए ।यता जिल्ला र प्रदेशका इन्चार्ज समेत बैठकले तोकेको छ ।
प्रतिक्रिया