कपिलवस्तुको विजयनगरमा तीन जना हैजाका विरामी भेटिए ।

कपिलवस्तु, ८ कार्तिक । कपिलवस्तुमा तीन जना हैजाका विरामी भेटिएका छन् । जिल्लाको विजयनगर गाउँपालिका वडा नं. ७ मा तीन जनामा हैजा प्रमाणित भएको जनाइएको छ । विजयनगर गाउँपालिका अध्यक्ष गोपाल थापाले पनि गाउँपालिकाका ३ जनामा हैजा देखिएको पुष्टि गर्नुभयो । हैजाको लक्षण देखिएर परिक्षण गर्दा हैजा प्रमाणित भएको भन्दै अब यसको रोकथाममा सिंगो गाउँपालिका लागेको उहाँले बताउनुभयो ।

छिमेकी स्थानीय तह कृष्णनगर र शिवराज नगरपालिकामा पनि झाडापखलाको महामारी देखिएको भन्दै यसको असर विजय नगरमा पनि परेको अध्यक्ष थापाले बताउनुभयो ।

जहाँत्यही दिसापिसाब गर्ने र दुषित पानी पिउने गर्दा यस्तो समस्या निम्तिएको उहाँले बताउनुभयो । भोलि देखि गाउँपालिका भर जनचेतनाका कार्यक्रम गर्ने योजना बनाएको उहाँले जनाउनुभयो ।