काठमाडौं ११ कात्तिक । अर्थमन्त्री जनार्दन शर्माले गृहमन्त्री बालकृष्ण खाँणको प्रस्ताव अस्वीकार गर्नुभएको छ । प्रधानमन्त्री शेरबहादुर देउवापछिको पहिलो बरियतामा रहनुभएका गृहमन्त्री खाँणले सनकको भरमा आर्थिक भार पर्नै गरी प्रस्ताव पठाएपछि अर्थमन्त्री शर्मा बिपक्षमा उभिनु भएको हो ।
गृहमन्त्री खाँणले नेपाल प्रहरीमा तत्काल प्रहरी नायब महानिरीक्षक (डिआइजी) र प्रहरी वरिष्ठ उपरीक्षक (एसएसपी) दरबन्दी थप्ने प्रहरी प्रधान कार्यालयको प्रस्तावलाई स्वीकृतीका लागि अर्थमा पठाउनु भएको थियो । प्रहरी प्रधान कार्यालयले ६ जना प्रहरी नायब महानिरीक्षक (डिआइजी) र पन्ध्र जना प्रहरी वरिष्ठ उपरीक्षक (एसएसपी)को दरबन्दी थप्न गत साता गृह मन्त्रालयमा प्रस्ताव पठाएको थियो । सो प्रस्ताव गृह मन्त्रालयको संगठन तथा व्यवस्थापन सर्वेक्षण (ओएन्डएम) समितिमा पुग्नुअघि भएको छलफलमा अर्थ मन्त्रालयले अस्वीकार गरेको हो ।
सो प्रस्ताव ओएन्डएम समितिमा जानुपूर्व केही दिनअघि भएको गृह र अर्थ मन्त्रालयबीचको छलफलमा अर्थमन्त्री शर्माले अस्वीकार गर्नुभएको हो । स्रोतका अनुसार अर्थमन्त्री शर्माले बैठकमै हावादारी प्रस्ताव भन्दै ठाडै अस्वीकार गर्नुभएको थियो । प्रहरी महानिरीक्षक शैलेश थापा क्षेत्रीलाई गृहमन्त्री खाँणले नै आदेश दिएर सो प्रस्ताव अघि बढेको थियो । गृहमन्त्री खाणले चुनावमा आफू निकट मान्छेलाई स्थान दिएर धाँधलीका लागि तयार पार्न तत्काल ‘पद’ सिर्जना गर्नुपर्ने भन्दै प्रहरी प्रधान कार्यालयलाई ‘प्रस्ताव ल्याउन’ आदेश दिनुभएको थियो ।
अहिले नेपाल प्रहरीमा १९ जना प्रहरी नायब महानिरीक्षक (डिआइजी) र प्रहरी वरिष्ठ उपरीक्षक (एसएसपी)मा ५५ जनाको दरबन्दी रहेको छ । प्रस्ताव स्वीकृत भएको भए २५ जना डिआइजी र ७० जना एसएसपी दरबन्दी कायम हुने थियो ।
प्रतिक्रिया