कपिलवस्तु, १८ मंसिर । लोकतान्त्रिक समाजवादी पार्टीका केन्द्रीय अध्यक्ष महन्त ठाकुरले मधेशी जनताप्रतिको विभेद अझैपनि कायम रहेको बताएका छन् । उनले जुनसुकै पार्टीको सरकार आए पनि मधेश र मधेशी माथि विभेद गर्दै आएको बताउँदै मधेशीहरुको मुद्दाहरु अहिले पनि समाधान नभएको बताए । उनले भने ‘जबसम्म मुद्दा समाधान हुँदैन तबसम्म हाम्रो संघर्ष जारी रहन्छ । अखिर किन मधेसीहरु माथि पटक–पटक विभेद र दु्रव्यवहार भइरहेको छ।’
कपिलवस्तु जिल्लाको सदरमुकाम तौलिहवामा आयोजित पार्टी प्रवेश तथा बृहत आम सभालाई सम्बोधन गर्दै उनले सो कुरा बताएका हुन् । उनले राज्यका सबै निकायमा मधेशीहरु प्रतिनिधित्व नभएको भन्दै समान सहभागिताको माग समेत गरेका छन् ।
जनसंख्याको आधारमा मधेशीको संख्या बढी भएतापनि सहभागिता भने न्यून रहेको भन्दै अध्यक्ष ठाकुरले आफू मधेशी जनताको हक अधिकारको पक्षमा सँधै काम गर्ने प्रतिवद्धता पनि जनाए । उक्त कार्यक्रममा लोसपा नेपालका वरिष्ठ नेताद्वय शरतसिंह भण्डारी र लोसपा केन्द्रिय कार्यकारिणी समिति सदस्य अनिल झा, लोसपा कार्यकारिणी समिति सदस्य अकवाल अहमद शाह र लोसपा लुम्बिनी प्रदेश संयोजक रविदत्त मिश्र लगाएतका नेताहरुले आफ्ना भनाई राखेका थिए ।
प्रतिक्रिया