देउवा र कोइराला महाधिवेशन प्रतिनिधिसँग मत माग्दै

काठमाण्डौ, २८ मंसिर । नेपाली कांग्रेसको १४ औँ महाधिवेशमा सभापतिका उम्मेदवार प्रधानमन्त्री शेरबहादुर देउवा र नेता डा. शेखर कोइरालाले मतदातासँग मत मागि रहनुभएको छ ।

राष्ट्रिय सभा गृहमा कायम रहेको मतदान केन्द्रमा मतदानका लागि लाइनमा बसेका मतदातासँग दुवै प्रत्याशीले आ–आफनो पक्षमा मतदान गर्न आग्रह गरिरहनुभएको हो ।

हिजो सोमवार भएको मतदानमा सभापति पदमा प्रत्यासी कसैको पनि ५१ प्रतिशत मत नपुगेपछि पार्टीको विधानअनुसार सभापति पदका लागि फेरि मतदान भएको हो । मतदानका लागि आज बेलुकी साढे ७ बजेसम्मको तयारी गरेको समिति संयोजक गोपालकृष्ण घिमिरेले जानकारी दिनुभयो ।

पहिलो चरणको मतदानमा प्रधानमन्त्री एवम् सभापति देउवाले दुई हजार दुई सय ५८ र उहाँका निकटतम प्रतिद्वन्द्वी पार्टीका केन्द्रीय सदस्य डा. शेखर कोइरालाले एक हजार सात सय दुई मत प्राप्त गर्नुभएको थियो ।