हत्या अभियोगमा २ वर्ष कारागार बसेपछि नसिमले पाए सफाई

कपिलवस्तु २८ पुस । बिगतको शशस्त्र द्वन्दमा ब्यक्ति हत्या गरेर सत्तासिन भएका माओवादी नेताले राजकाज चलाई रहदा त्यस्तै प्रकृतीको अभियोगमा कारागारमा सजाय काट्न वाध्य कपिलवस्तुका नसिम खान (वादशाह)ले ढिलै भएपनि सफाई पाएका छन् । हत्या तथा ज्यान मार्ने उद्योग, डकैती लगायतका आरोपमा विपक्षी बनाएर मुद्दा दायर गरिएका नसिम (बादशाह) ले जिल्ला अदालत कपिलवस्तुबाट सफाई पाएका हुन् । जिल्ला न्यायाधीश जवाहिर सिंहको इजलासले नसिम खान र उनीसँग जोडिएका सबैलाई सफाइ दिएको हो । बादशाह कपिलवस्तु मायादेवी गाउँपालिका–४ का निवासी हुन् भने उनकी श्रीमती लुम्बिनी प्रदेश सभा सदस्य छिन् ।
जिल्ला अदालत कपिलवस्तुले ८ जनाको हत्या आरोपित बादशाहलाई अभियोग दावी नपुगेको भन्दै सफाइ दिएको हो । उनीमाथि आठ जनाको हत्या, एक ज्यान मार्ने उद्योग र डाँका मुद्दा चलाइएको थियो । माओवादी जनयुद्धका क्रममा तत्कालीन सरकारको समर्थनमा कपिलवस्तुमा चलाइएको माओवादीविरुद्धको प्रतिकार समितिका मुख्य नाइके नसिमले त्यसबेला माओवादी कार्यकर्ताको हत्या गरेको आरोप लागेको थियो । ब्यक्ति हत्याको अभियोग लागेर अदालतमा मुद्धा विचाराधीन रहेका अग्नी सापकोटा यो देशका सभामुख छन् । तर शसशस्त्र मधेस विद्रोहका एक सैन्य कमाण्डर नसिम भने हत्या अभियोगमा २ वर्ष कारागार बसेर बल्ल सफाई पाएका छन्।
चार जना माओवादी कार्यकर्ता, दुई जना बालबालिका र एक जना कर्मचारीको हत्या आरोपित नसिमलाई प्रहरीको केन्द्रीय अनुसन्धान ब्युरो सीआईबीले २ वर्षअघि काठमाडौँबाट पक्राउ गरेको थियो । त्यसपछि उनलाई कपिलबस्तु ल्याएर मुद्दा चलाइएको थियो ।