तस्करी नियन्त्रणका लागि खटिएको सशस्त्र प्रहरीको टोलीनै किन संलग्न आरोपमा मुछिए त ?

काठमाडौं २८ पुस – सीमा सुरक्षा तथा तस्करी नियन्त्रणका लागि खटिएको सशस्त्र प्रहरी बलको एक टोली नै तस्करीमा संलग्न भएको आरोपमा मुछिएको छ। दक्षिणी सीमा क्षेत्र नवलपसारी (पूर्व)को गैँडाकोट नगरपालिका–१०, पितौजीस्थित सशस्त्र प्रहरीको ३१ नम्बर गुल्मबाटै तस्करीका सामान भनेर बरामद गरेका सामानहरु बेच्ने गरेको आरोप लागेको छ।

तस्करीमा सामान बोक्न लगाउने सशस्त्र प्रहरी अधिकारीले उन्मुक्ति पाएको तर, सामान बोक्ने आफू भने कारबाहीको भागिदार भएको भन्दै एक सर्वसाधारण न्यायका लागि करिब २ वर्षदेखि विभिन्न निकाय धाइरहेका छन्।

घटना २०७६ चैतको हो। रा१च ९४३ नम्बरको टाटा एस गाडीका चालक ५० वर्षीय द्रोण केसीले हल्चोक क्षेत्रमा गाडी पार्किङ गरेर राख्दै थिए। त्यति नै बेला एक अपरिचत व्यक्तिले उनलाई सामान लिन नारायणगढसम्म जाने प्रस्ताव गरे। ‘फेन्सी सामान लिन जानुपर्ने र १५ हजार भाडा दिने भनेपछि म तयार भएँ’, द्रोणले नेपाल लाइभसँग भने, ‘नारायणगढ भनेर नवलपुर पुर्‍याए।’

उनका अनुसार २०७६ चैत १ गते राति साढे ८ बजेतिर सशस्त्र प्रहरीको ३१ नम्बर गुल्म (ब्यारेक) बाट लेडिज कपडा ८ बोरा लोड भयो। ‘ब्यारेकबाट एक सिपाहीले तलबाट सामान दिए, मैले गाडीमा मिलाएँ’, द्रोणले भनेका छन्।

द्रोणलाई फेन्सी सामान भनेर सशस्त्रको ब्यारेकमा पुर्‍याएर सामान लोड गराउने व्यक्ति थिए, मकवानपुरका रामहरि लुँइटेल र दाङका मेघे राउत। द्रोणसँगै अर्को निजी कारमा उनीहरु पनि काठमाडौंबाट गैँडाकोटस्थित सशस्त्रको ब्यारेकसम्मै पुगेका थिए। सामान लिएर उनीहरु करिब ९ बजे राति गैँडाकोटबाट काठमाडौंका लागि हिँडे। रामहरि र मेघे निजी कारमा फर्किए भने द्रोणले सामान बोकेको गाडी हाँके। नागढुंगा चेकपोस्टमा आएपछि प्रहरीले द्रोणको गाडी रोक्यो। फेन्सी सामानको बिल माग्यो।

‘सुरक्षाकर्मीको ब्यारेकबाट सामान लोड भएकाले मैले बिलबारे कुरै नगरी सामान बोकेको थिएँ। प्रहरीले बिल मागेपछि मैले बिल भएको मान्छे आउँदैछन् भनेर रामहरिलाई फोन गरेँ’, द्रोणले नेपाल लाइभसँग भने, ‘रामहरिले आइपुग्न लागेको भनेका थिए। तर, निकैबेर कुर्दा उनी आएनन्। त्यसपछि प्रहरीले सामान, गाडीसहित मलाई भन्सार कार्यालय बुझायो।’

बिना बिल बिजक भन्सार छलेर सामान ल्याएको भन्दै महानगरीय प्रहरी वृत्त थानकोटले द्रोणलाई कारबाही गर्न भनेर त्रिभुवन अन्तर्राष्ट्रिय विमानस्थल भन्सार कार्यालय पठाएको थियो। त्यसबेला वृत्तका डीएसपी घनश्याम श्रेष्ठ थिए। आउँछु भन्दै नआएपछि द्रोणले घनश्यामलाई त्यसबेला रामहरिसँग कुरा गर्न भन्दै नम्बर दिएका थिए। डीएसपी श्रेष्ठले रामहरिसँग फोनमा कुराकानी पनि गरे। तर, उनलाई पक्राउ गर्नुको साटो द्रोणलाई मात्रै डीएसपी श्रेष्ठले भन्सारको जिम्मा लगाए।

द्रोणले भन्सार कार्यालयमा पनि आफू निर्दोष रहेको, भाडामा सामान बोक्न मात्रै गएको बताएका थिए। यस घटनामा सशस्त्र प्रहरीदेखि रामहरि र मेघे दोषी रहेको उनको भनाइ थियो। ८ दिन हिरासतमा राखेपछि २ लाख ३० हजार ५०० धरौटीमा द्रोण रिहा भए। रिहापछि अहिलेसम्म उनी न्यायका लागि लडिरहेका छन्।

स्रोतका अनुसार ३१ नम्बर गुल्मले तस्करीका सामान नियन्त्रणमा लिने र व्यापारी रामहरिलाई बेच्ने गरेको थियो। त्यही सामान बोक्दा द्रोण फसेका थिए।

सशस्त्र प्रहरीकै ब्यारेकबाट सामान लोड भएकाले घटनाको छानबिन गरी तस्करीको सामान नियन्त्रणमा लिएर बेच्न सशस्त्र प्रहरी र फरार दुई व्यापारी (रामहरि र मेघे)लाई कारबाही गरी पाउँ भन्दै उनले सशस्त्रको हेडक्वार्टरदेखि महानगरीय प्रहरी परिसर काठमाडौं, अख्तियार दुरुपयोग अनुसन्धान आयोग र भन्सार कार्यालयसम्म लिखित निवेदन दिएका थिए। तर, कतैबाट अहिलेसम्म सुनुवाइ नभएको उनले बताए।

सशस्त्रले ‘यस घटना हाम्रो क्षेत्राधिकारभित्र नपरेको र भन्सारले नै सबै काम गर्ने’ भन्दै जवाफ फर्काएको थियो। परिसर काठमाडौंले पनि भन्सारलाई देखाउँदै पन्छिएको थियो।

यता भन्सार कार्यालयले भने रामहरि र मेघेलाई पक्राउ गरी ल्याउन भन्दै उनीहरुको ठेगानासहित जिल्ला प्रहरी कार्यालय मकवानपुर र दाङ प्रहरीलाई पत्र पठाएको थियो। तर, अहिलेसम्म प्रहरीले उनीहरुलाई पक्राउ गरेर उपस्थित गराउन सकेको छैन।

मान्छे नै फेला नपरेको जवाफ प्रहरीले पठाएको छ। जबकि द्रोण आफैंले ठेगाना खोज्दै मकवानपुर पुगेर रामहरिलाई भेटेका थिए। ‘नफस्नु फसिहालियो अब म केस सल्टाउँछु’ भनेर आश्वासन दिएका रामहरि त्यसपछि सम्पर्कविहीन भएको द्रोणको भनाइ छ।

‘तस्करी गर्ने सशस्त्र प्रहरी, व्यापारी, सजाय पाउने म जस्तो सर्वसाधारण? न्याय भन्ने चिज हराएको महसुस भयो’, द्रोणले भने, ‘बिना कसूर दुःख त पाइयो नै। १६ लाखमा किनेको गाडी अहिलेसम्म भन्सारले फिर्ता दिएको छैन। किस्ता भने हालिराख्नु परेको छ। अब हामीजस्तो सर्वसाधारण कसरी बाँच्ने? कतैबाट न्याय नपाइने भइयो।’

द्रोणले भनेको बेला ३१ नम्बर गुल्मको गुल्मपति थिए, सशस्त्रका डीएसपी भानुभक्त लम्साल। डीएसपी लम्सालले द्रोणको कुरा अस्वीकार गरे। ‘सशस्त्रको ब्यारेकबाटै तस्करीका सामान लोड हुने भन्ने कुरा हुँदैन। त्यसो भन्दा आफू जोगिन्छु कि भनेर उहाँले भन्नु भएको होला’, उनले भने।

यस विषयमा उजुरी परेपछि कानुन शाखाले समेत छानबिन गरिसकेको र आफू निर्दोष रहेको डीएसपी लम्सालको दाबी छ।