घोराही कारागारबाट प्रहरीको मोटरसाइकल लिएर भागेका नाइके पक्राउ

दाङ, १० माघ । दाङको घोराही कारागारबाट एक महिनाअघि भागेका नाइके यमराज परियार पक्राउ परेका छन् ।

परियार आज सोमवार भारतबाट पक्राउ परेका हुन् । परियारलाई भारतबाट आजै घोराही ल्याइने एक प्रहरी अधिकृतले जानकारी दिएका छन् । परियार गएको पुस ८ गते दिउँसो प्रहरीको मोटरसाइकल लिएर भागेका थिए ।

प्रहरीको केन्द्रीय अनुसन्धान ब्युरो सीआईबी को टोली पनि परियारको खोजीमा लागेको थियो । उनी बस्ने ठाउँको यकिन गरेपछि दुई दिन अगाडि दाङका प्रहरी नायब उपरीक्षक डीएसपी मुकुन्दप्रसाद रिजाल भारत पुग्नुभएको थियो ।

कर्तव्य ज्यान मुद्दामा साढे सात वर्ष कैद भुक्तान गरिसकेका नाइके परियारलाई जिल्ला अदालतले २० वर्ष कैद सजाय तोकेको थियो । प्रहरीले आज बेलुकी पत्रकार सम्मेलन गरेर घटनाबारे विस्तृत विवरण सार्वजनिक गर्ने तयारी गरेको छ ।