तत्काल स्थानीय चुनाव तोक्न निर्वाचन आयोगको सरकारलाई पुन ताकेता

काठमाडौं ११ माघ । निर्वाचन आयोगले तत्काल स्थानीय तहको निर्वाचनको मिति तोक्न सरकारलाई आग्रह गरेको छ। मंगलवार विज्ञप्ति जारी गर्दै आयोगले १ बैशाखभित्रै स्थानीय तहको निर्वाचन गराउन आयोग तयार रहेको भन्दै चुनावको मिति तोक्न सरकारलाई आग्रह गरेको हो।यसअघि आयोगले जेठ ८ र पुस ९ मा सरकारलाई र पुस ३० गते सर्वदलीय बैठक मार्फत १६ दललाई ध्यानकर्षण गराएको थियो। स्थानीय तह निर्वाचन ऐन २०७३ को दफा ४ अनुसार २०७८ जेठ ५ गते स्थानीय तह रिक्त रहने भएकाले चुनावको मिति तोक्न आयोगले ताकेता गरेको हो। बैशाख १४ र २२ गते चुनाव गर्न आयोगले प्रस्ताव गरेको थियो।

निर्वाचनको मिति तोक्न ढिला भएमा व्यवस्थापनमा जटिलता हुने भन्दै आयोगले सरकारलाई सचेत गराएको हो।‘स्थानीय तहको निर्वाचनको मिति तोक्न जति विलम्ब हुँदै जान्छ त्यति नै निर्वाचनको व्यवस्थापनको कार्य व्यवहारिक एवं प्राविधिक कारणले जटिल बन्दै जान्छ,’ आयोगले भनेको छ।सत्तारुढ गठबन्धनले भने स्थानीय तहको निर्वाचन आयोगले प्रस्ताव गरेको समयमा गर्न नसकिने भन्दै आउने चैतसम्म धकेल्ने तयारी गरिरहेका छन्। गठबन्धनका नेताहरुले तीनै तहको निर्वाचन एकै पटक गर्न पनि सरकारलाई सुझाव दिइरहेका छन्।