यथास्थितिमा नो एमसीसीः नेता झलनाथ खनाल

काठमाण्डौ, १५ फागुन । सत्ता साझेदार नेकपा एकीकृत समाजवादी पार्टीका सम्मानित नेता झलनाथ खनालले यथा स्थितिमा एमसीसी पासगर्न नहुने बताउनु भएको छ । नेता खनालले संसद् जस्तो महत्त्वपूर्ण थलोबाट पनि देशको विरुद्ध केही हुन्छ कि भनेर आम नागरिक चिन्तित भएको बताउनुभएको छ ।अमेरिकी सहायता एमसीसी सम्झौताको बारेमा संसदमा भएको छलफलमा भाग लिँदै खनालले देशका नागरिकले नेपाल र यहाँको कानुनविरुद्ध नभइ सार्वभौमसत्ता र स्वाधीनता रक्षाका लागि सडक आन्दोलन गरिरहेको र संसद्ले पनि गलत गर्छ कि भनेर चिन्तामा रहेको बताउनुभयो । यस्तो महत्त्को विषयमा संसदमा छलफल हुनुपर्नेमा कुनै दलको विरोध र अशान्त वातावरणमा छलफल थालेकोमा आपत्ति जनाउनुभयो ।

‘नागरिक देशको स्वाधीनता र सार्वभौमसत्ताको विषयमा चासो गर्दै आन्दोलनमा छन् । प्रहरीले लाठी चार्ज गरिरहेको छ । उनीहरूले देश र कानुनको विरुद्धमा आवाज बोलिरहेका होइनन्, दमनको यसको निन्दा गर्न चाहन्छु’, खनालले भन्नुभयो ।संसदमा भइरहेको अवरोधलाई लिएर उहाँले भन्नुभयो, ‘हामीले कस्तो वातावरणमा यो छलफल गरिरहेका छौँ रु सभा शान्त हुनुपर्थ्यो कि पर्दैनथ्यो ? सभामुख सभाको अब्बल नेता हो, तपाईँले सञ्चालन गरिरको अवस्था सिङ्गो नेपालले हेरिरहेको छ, आफैँले विचार गर्नुहोला ।’