थापाको दाबी : चुनावमा कांग्रेसले सानदार ढंगले जित्छ अनि ५ वर्ष सरकार चलाउछ

काठमाडौं २१ फागुन : नेपाली कांग्रेसका महामन्त्री गगन थापाले आउँदो आम चुनावमा नेपाली कांग्रेसले सानदार ढंगले बहुमत ल्याउने दाबी गरेका छन्। नेपाल प्रज्ञा प्रतिष्ठानमा सुरु भएको नेपाल कर्मचारी युनियनको आठौँ महाधिवेशनलाई सम्बोधन गर्दै महामन्त्री थापाले यस्तो दाबी गरेका हुन्।

स्थानीय निर्वाचन तोकिएको समयमै हुने उल्लेख गर्दै थापाले संसदलाई एमालेले चल्न नदिए आम चुनाव केही चाँडो हुन सक्ने समेत बताए।

‘वैशाख ३० गते कांग्रेसले स्थानीय चुनाव गराउँछ। त्यसपछि आम चुनाव हुन्छ। संसद चलाउन हामीले एमालेलाई फकाएका छौं। जति गरे पनि एमालेले अवरोध प्रयास जारी राखे किन संसद चलाइराख्ने भन्न प्रश्न आउन सक्छ। अनि आम चुनाव अगाडि पनि हुन सक्छ,’ थापाले भने, ‘स्थानीय चुनाव तलमाथि हुँदैन र यसवर्ष सानदार ढंगले चुनाव जितेर आएर पाँच वर्ष सरकार चलाउँछ।’