कपिलवस्तु उद्योग बाणिज्य संघको आयोजनामा हुने १२ औं कपिलवस्तु महोत्सव एवम् कृषि, पर्यटन तथा औधोगिक प्रदर्शनीको तयारी तीब्र पारिएको छ । ‘सक्षम व्यवसायी समृद्ध राष्ट्र र स्वाधिन अर्थतन्त्र’ भन्ने मुल नाराका साथ महोत्सव आगामी चैत्र ३ गतेदेखि चैत्र १३ गतेसम्म बाणगंगा १ जीतपुर स्थित बुद्ध रंगशालामा सञ्चालन हुँदैछ । महोत्सवको करिब ६० प्रतिशत तयारी पूरा भइसकेको कपिलवस्तु उद्योग बाणिज्य संघका महासचिव मनोज पौडेलले बताए । पहिले नै तय भएको महोत्सव कोरोना संक्रमणको त्रासले स्थगित भएको स्मरण गर्दै महासचिव पौडेलले महोत्सवलाई निरन्तरता दिनुपर्छ भन्ने मान्यतालाई आत्मासाथ गर्न पनि महोत्सव गर्न लागिएको बताए । सुस्ताएको अर्थतन्त्रलाई चलायमान गराउन महोत्सव कोशेढुङ्गा सावित हुने उनको दाबी छ ।
यस क्षेत्रको पहिचानको लागी महोत्सव महत्वपूर्ण रहने बताउँदै महासचिव पौडेलले महोत्सवमा पुरातात्विक सम्पदा, धार्मिक, पर्यटकीय स्थलको प्रवर्द्धन गर्ने उद्देश्यले कपिलवस्तुको सम्रग अवस्था झल्किने गरि काम भईरहेको बताए । यस क्षेत्रको उद्योग, व्यापार, पर्यटन, भेषभूषा, कला, संस्कृति, ऐतिहासिक स्थल संरक्षण तथा प्रवद्र्धन गर्न महोत्सव संचालन गर्न लगिएको उनको भनाइ छ ।
महोत्सवमा करिब २ लाख बढी दर्शकले अवलोकन गर्ने दाबी गर्दै उनले ५ करोड भन्दा माथिको आर्थिक कारोबार गर्ने आफुहरुको लक्ष्य रहेको बताए । उनले महोत्सव संचालन गरेको लामो अनुभव रहेको स्मरण गर्दै महोत्सवलाई उत्कृष्ट बनाउन विभिन्न समिति तथा उपसमितिहरु ग्ठन गर्दै काम अघि बढेको बताए । मौसम प्रतिकुल हुने हो कि भन्ने चुनौति आफुहरुको माँझ रहेको बताउँदै उनले मौसम पूर्वअनुमानको ख्याल गरेर नै अघि बढेको र महोत्सव सहज रुपमा सफल हुने विश्वास व्यक्त गरे ।
मेलामा तीन सय स्टल रहने आयोजकले जनाएको छ । महोत्सव स्थलमा कक्ष निर्माण, महोत्सवको मूलगेट निर्माण र सचिवालय निर्माणको काम अन्तिम चरणमा पुगेको आयोजकले जनाएको छ ।
प्रतिक्रिया