विश्वकप लिग टूः पपुवा न्युगिनीमाथि नेपालको जित

काठमाडौ
२ चैत/ यूएईमा जारी विश्वकप क्रिकेट लिग २ अन्तर्गत बुधबार भएको खेलमा नेपालले पपुपा न्युगिनी (पीएनजी) माथि संघर्षपूर्ण जित हात पारेको छ । करण केसीले अन्तिम ओभरमा चौका र छक्का प्रहार गरेपछि विश्वकप लिग टू अन्तर्गत पपुवा न्युगिनीलाई २ विकेटले पराजित गरेको छ ।

युएईको सारजाहँ रंगशालामा पीएनजीले दिएको २०५ रनको लक्ष्य नेपालले ४९.२ ओभरमा ८ विकेट गुमाएर भेट्टाएको हो । कमजोर सुरुआत गरे पनि रोहित पौडेल र आरिफ शेखले पाँचौं विकेटका लागि १ सय २ रनको कीर्तिमानी साझेदारी गरेपछि नेपालको जित सहज भएको हो ।

१५ ओभरभित्रै ४ विकेट गुमाएर संकटमा परेको नेपालको पारी उकास्न रोहित र आरिफले अर्धशतकीय योगदान गरे । म्यान अफ द म्याचसमेत बनेका रोहितले ५८ र आरिफले ५३ रन जोडेका हुन् । एकदिवशीय अन्तर्राष्ट्रियमा रोहितको यो चौथो र आरिफको पहिलो अर्धशतक हो ।

यसअघि टस जितेर पहिले ब्याटिङ गरेको पीएनजीले निर्धारित ओभरमा ८ विकेट गुमाएर २ सय ४ रनको योगफल खडा गरेको थियो । पीएनजीका चाल्र्स अमिनीले ५९ रन बनाएका थिए । बलिङमा सोमपाल कामीले ३ विकेट लिँदा कप्तान सन्दीप लामिछाने, पूर्व कप्तान ज्ञानेन्द्र मल्ल र आरिफ शेखले १–१ विकेट लिए ।