सर्वोच्चद्वारा रमेश सिलवालको रिट खारेज

काठमाडौं २२ चैत । सर्वोच्च अदालतले राष्ट्रिय खेलकुद परिषद् (राखेप)का पूर्व सदस्य सचिव रमेश सिलवालले आफूलाई गैरकानुनी रूपमा हटाइएको भन्दै पुनर्बहालीको माग गर्दै दायर गरेको रिट खारेज गरेको छ ।

न्यायाधीशद्वय अनिलकुमार सिन्हा र कुमार रेग्मीको संयुक्त इजलासले रिट खारेज गरेसँगै सदस्य सचिव टंकलाल घिसिङलाई काम गर्ने बाटो खुलेको छ । केपी ओली नेतृत्वको सरकारले नियुक्त गरेका सिलवाललाई हटाएर वर्तमान देउवा सरकारले घिसिङलाई सदस्यसचिव नियुक्त गरेको थियो । त्यसपछि सिलवाल अदालत पुगेका थिए ।

लामो समयसम्म राखेप नेतृत्वको विवाद अदालतमा थाती रहँदा नेपाली खेलकुद क्षेत्रको नीतिगत र मुख्य कामहरु प्रभावित भएको थियो ।