बिस्केट जात्रामा रथको पाङ्ग्राले च्यापिएर एक वृद्धकाे मृत्यु

भक्तपुर ५ बैशाख – भक्तपुरमा बिस्केट जात्रामा रथको पाङ्ग्राले च्यापिएर एक जना वृद्धकाे ज्यान गएको छ । 

जात्राको अन्तिम दिन आज साेमवार दिउँसो पौने चार बजेतिर गहिटीबाट बंशगोपालतर्फ लैजाँदै गरिएको रथ नासमाना चोकमा पुग्दा रथको पाङ्ग्राले एक वृद्धलाई च्यापेकाे थियाे । पाङ्ग्राले च्यापिएर सूर्यविनायक नगरपालिका ५ का ७१ वर्षका दुर्गामान कस्पालको ज्यान गएको महानगरीय प्रहरी परिसर भक्तपुरका प्रहरी नायब उपरीक्षक (डीएसपी) एवम् सूचना अधिकारी राजु पाण्डेले जानकारी दिनुभयो । 

रथकाे पाङ्ग्राले च्यापिएपछि घाइते भएका कस्पालको उपचारका क्रममा भक्तपुर अस्पतालमा ज्यान गएको हो ।