नाबलिग गायिकाको बुवाले पनि फेरे बयान

नाबलिग गायिकाको बुवाको पनि बयान फेरिएको छ। नायक पल शाहलाई जबर्जस्ती करणीको अभियोग लगाउँदै उजुरी दिएका गायिकाको बुवाले जिल्ला अदालत तनहुँमा भएको बकपत्रमा बयान फेरेका हुन्। उनले जबर्जस्ती करणी नभएको उल्लेख गरेका छन्।

जाहेरी आफैँले दिएपनि जबर्जस्ती करणी नभएको भनेर बयान दिएको जिल्ला न्यायाधिवक्ता रामचन्द्र शर्माले बताए। आइतबार भएको बकपत्रमा पीडित भनिएकी ती गायिकाले पनि बयान फैर्दै शारीरिक सम्पर्क नभएको बताएकी थिइन्।

गत फागुन ११ गते जिल्ला प्रहरी कार्यालय तनहुँमा गायिकाको बुवाले नायक शाहविरुद्ध जाहेरी दिएका थिए। चार दिनपछाडि १५ फागुनमा पलले प्रहरी समक्ष आत्मसमर्पण गरेका हुन्।

जिल्ला अदालत तनहुँले शाहलाई चैत १० गते थुनछेक आदेश जारी गर्दै पुर्पक्षका लागि थुनामा पठाएको थियो। बकपत्र सुरु भएसँगै जाहेरवाला पक्षले एकाएक बयान फेरेका छन्।