रुस र बेलारुसका टेनिस खेलाडीले विम्बल्डन प्रतियोगिता खेल्न नपाउने

रुस र बेलारुसका टेनिस खेलाडीले विम्बल्डन प्रतियोगिता खेल्न नपाउने भएका छन् । रुसले युक्रेनमा गरेको आक्रमणलाई कारण देखाएर बेलायतको सर्वोच्च टेनिस संस्था अल इङ्ल्यान्ड क्लबले रुसी र बेलारुसी खेलाडीलाई आउँदो जुनमा हुने तेस्रो ग्रान्डस्लाम विम्बल्डन खेल्न प्रतिबन्ध लगाउने घोषणा गरेको हो । 

एटीपी, डब्ल्यूटीए टुर्स र अन्तर्राष्ट्रिय टेनिस महासङ्घले रुसी खेलाडीलाई प्रतिबन्ध नलगाए पनि इङ्ल्यान्डले भने प्रतिबन्ध लगाएको हो । इङ्ल्यान्डकाे यो निर्णयले विश्व वरीयताको दोस्रो स्थानमा रहेका ड्यानियले मेदभेदेव र आठौँ वरीयतामा रहेका आन्द्रे रबलेभको शीर्ष स्थानमा पुग्ने सपनामा झट्का लागेको रोयटर्सले जनाएको छ । 

यसअघि गएको मार्चमा बेलायती खेलकुदमन्त्री निगेल हडलस्टनले रुसको झन्डा फहराउने कुनै पनि व्यक्तिलाई आफ्नो देशमा प्रवेशको अनुमति दिन नहुने बताउनुभएको थियो । रुसले युक्रेनमा आक्रमण गरेको कारणलाई देखाएर रुसलाई फिफाले विश्व कप फुटबलको छनोट खेल्नबाट रोक लगाएको छ भने यूईएफएले च्याम्पियन्स लिगमा पनि प्रतिबन्ध लगाएको छ ।