कपिलवस्तु : स्थानीय तह निर्वाचन नजिकिएसँगै उम्मेदवारहरूले घरदैलो अभियानलाई तीव्रता दिएका छन् । उम्मेदवारको अन्तिम नामावली प्रकाशनसँगै निर्वाचन चिन्ह प्राप्त गरेपछि कपिलवस्तुका १० वटै स्थानीय तहमा चुनावी माहोल ह्वात्तै बढेको हो । उम्मेदवारहरू आफ्ना घोषणापत्र र प्रचारप्रसार सामग्रीसहित कार्यकर्ताको हुल बाँधेर घरदैलोमा जुटेका छन् ।
१० वटा स्थानीय तह रहेको कपिलवस्तुमा आफ्ना मतदाता रिझाउन उम्मेदवारहरु घर तथा खेतबारीमा समेत पुग्ने गरेका छन् । कपिलवस्तुमा बाणगंगासहित कपिलवस्तु, बुद्धभूमि, शिवराज, कृष्णनगर, महाराजगंज गरि ६ नगरपालिका र विजयनगर, शुद्धोधन, यशोधरा र मायादेवी गरि ४ गाउँपालिका रहेका छन् । यी सबै नगरपालिका र गाउँपालिकामा जम्मा ९६ वटा वडाहरु छन् । निर्वाचन कार्यालय कपिलवस्तुका अनुसार आसन्न निर्वाचनमा जिल्लाको १० पालिकामा ३ हजार ५ सय ५३ उम्मेदवार प्रतिस्पर्धामा छन् । जिल्लाका १० पालिकाका लागि २ सय ३५ मतदान स्थलमा ४ सय ६८ मतदान केन्द्र राखिने छन ।
सबै उम्मेदवारहरू बिहान सबेरैदेखि राति अबेरसम्म दलका झण्डा, उम्मेदवारहरूको फोटो र निर्वाचन चिन्ह बोकेर मतदाताको घरघरमा पसिरहेका छन् । यो पटक विभिन्न अनलाइन, टिकटक, फेसबुकलगायत सामाजिक सञ्जाललाई पनि उम्मेदवारले प्रयोग गरिरहेका छन् ।
प्रतिक्रिया