पुराना जहाज किन्न कडाइ गर्ने मन्त्री आलेको घोषणामा वायुसेवा कम्पनीले जनायो कडा विरोध

काठमाडौं, ०३ असार । संस्कृति, पर्यटन तथा नागरिक उड्डयन मन्त्री प्रेम आलले संसदमा घोषणा गरेको पुराना जहाज खरिद गर्ने समय घटाउने विषयप्रति वायुसेवा कम्पनीहरूले कडा विरोध जनाएका छन् । 

उनीहरूले मन्त्रीले स्वेच्छाचारी, अव्यवहारिक तथा तर्कहीन अभिव्यक्ति भएको भन्दै यसलाई कार्यान्वयन नगर्न–नगराउन प्रधानमन्त्री समक्ष आग्रह समेत गरेका छन् ।

शुक्रबार प्रधानमन्त्रीलाई पत्र लेख्दै वायुसेवा सञ्चालक संघका अध्यक्ष क्या. रामेश्वर थापाले संवाद नै नगरी मन्त्रीबाट एकतर्फी अभिव्यक्ति दिएको बताउनुभएको छ ।   

यसअघि १ असारमा संसदमा बोल्दै मन्त्री आलेले प्रेसराइज जहाज १० वर्ष र ननप्रेसराइज जहाज १५ वर्ष पुरानो भएपछि किन्न नपाउने गरी सरकारले नियम बनाउन लागेको बताउनुभएको थियो । अहिले यस्तो नियम १५ र २० वर्ष रहेको छ ।

क्या. थापाले जहाजको हरेक पार्टपुर्जाको निश्चित साइकल तथा अवधि हुने भन्दै अन्तर्राष्ट्रिय मापदण्डको अक्षरशः पालना गरिएको समेत जनाउनुभएको छ । 

उहाँले भन्नुभएको छ, ‘विमानको उमेरसँग जहाज दुर्घटना कदापि दाँज्न मिल्दैन, हरेक दुर्घटनाको छानबिन प्रतिवेदन हेर्दा सबै छर्लङ्ग हुन्छ । हवाई इन्धन अत्यधिक महँगो हुनु, डलरको विनिमय दर बढिरहेको समयमा हवाई सेवाको लागत बढेको भन्दै यस्तो नियम लागू भएमा यात्रुमाथि भार पर्ने समेत वायुसेवा सञ्चालकहरूको भनाइ छ ।