सन्धिखर्क, १३ साउन ।
अर्घाखाँचीको शितगंगा नगरपालिकामा लागुऔषध ब्राउन सुगरसहित ३ जना पक्राउ परेका छन् । शितगंगा नगरपालिका वडा नम्बर–८, सातमाराको सुपादेउराली मन्दिरमा बसेर लागुऔषध सेवन गरिरहेका दाङको राप्ती गाउँपालिकाका तीनजना पक्राउ परेका जिल्ला प्रहरी कार्यालय अर्घाखाँचीका प्रहरी नायव उपरीक्षक अमर बहादुर थापाले बताए ।
पक्राउ पर्नेमा दाङको राप्ती गाउँपालिका वडा नम्बर–१ का २८ वर्षीय सन्तोष केसी, सोही ठाउँका २४ वर्षीय खुम बहादुर केसी र २२ वर्षिय रोशन श्रेष्ठ रहेका छन् । उनीहरुको साथबाट लागुऔषध (ब्राउन सुगर) जस्तो देखिने खैरो गिलो पदार्थ ६० मिली ग्राम, लागुऔषध सेवन गर्दा प्रयोग गरिने ब्लेटको टुक्रा २ थान, सानो प्लेट १ थान र लाईटर १ थान फेला परेको जिल्ला प्रहरी कार्यालय अर्घाखाँचीका प्रमुख थापाले जानकारी दिए ।
उनीहरुलाई ईलाका प्रहरी कार्यालय ठाडा र अस्थायी प्रहरीचौकी सातमाराबाट खटिएको प्रहरी टोलीले लागुऔषध सेवन गरी रहेको अवस्थामा रंगेहात पक्रेको थियो । पक्राउ परेका तिनै जनालाई लागुऔषध मुद्धामा जिल्ला अदालतबाट ७ दिनको म्याद थप गरी अनुसन्धान भइरहेको छ । मन्दिरमा लागुऔषध सेवन गरी होहल्ला गरेपछि स्थानीयले प्रहरीलाई खबर गरेका थिए ।
प्रतिक्रिया