दुर्घटनामा परी दाजुभाइसहित तीन जनाको मृत्यु

रोल्पा १० कार्तिक । रोल्पामा हिजो जिप दुर्घटना हुँदा तीन जनाको मृत्यु भएको छ। रोल्पाको सुनिल स्मृति गाउँपालिका–४ सेवा केन्द्रनजिकै जुगेखोलामा भएको जिप दुर्घटनामा परी दाजुभाइसहित तीन जनाको मृत्यु भएको हो। दुर्घटनामा घोराही उपमहानगरपालिकाका ५८ वर्षीय विष्णुप्रसाद रिजाल, सोही ठाउँका ६० वर्षीय नारायणप्रसाद रिजाल र दाङ राप्ती गाउँपालिका–१ भालुबाङका ५० वर्षीया फाम्सी केसीको मृत्यु भएको जिल्ला प्रहरी कार्यालय रोल्पाले जानकारी दिएको छ।
रोल्पाको सुलिचौरबाट गजुलतर्फ जाँदै गरेको लु१ज ३२३४ नंको जिप दुर्घटना भएको हो। जिप सडकबाट करिब एक सय मिटर तल खसेको हो। जिपमा १५ जना सवार रहेको प्रहरीले बताएको छ। दुर्घटनामा १२ जना घाइते भएका छन् भने सात जनाको अवस्था गम्भीर छ।
घाइतेलाई प्राथमिक उपचारपछि थप उपचारका लागि मेडिकल कलेज कोहलपुरमा सिफारिस गरिएको इलाका प्रहरी कार्यलय सुलिचौरका इन्चार्ज ओमप्रकाश वाग्लेले जनकारी दिए। जिपको अचानक ब्रेकले काम नगर्दा दुर्घटना भएको प्रहरीले बताएको छ।