ब्याज वृद्धिको विरोधमा व्यवसायी

घोराही २२ कात्तिक । मङ्सिर ४ गते हुन थालेको प्रतिनिधि सभा र प्रदेश सभा सदस्य निर्वाचनका लागि राजनीतिक दल तथा उम्मेदवार प्रचारप्रसारमा व्यस्त छन् । निर्वाचनको मिति नजिकिएसँगै उम्मेदवार मतदाता भेट्न सहरदेखि गाउँगाउँसम्म पुगेर निर्वाचनको वातावरण तताइरहेको समयमा उद्योगी तथा व्यवसायी भने आन्दोलनमा जुटेका छन् ।
वाणिज्य बैङ्कले वृद्धि गरेको ब्याजदरविरुद्ध व्यवसायीले सडक आन्दोलन थालेका हुन्। दाङ जिल्ला उद्योग वाणिज्य सङ्घको नेतृत्वमा उद्योगी तथा व्यवसायीले सोमबार घोराही, तुलसीपुर र लमहीलगायतका विभिन्न क्षेत्रमा विरोध प्रदर्शन गरेका हुन् । निजी क्षेत्रलाई धराशायी बनाउने गरी बैङ्क तथा वित्तीय संस्थाले महिनैपिच्छे बढाइरहेको कर्जा ब्याजदर घटाउनुपर्नेलगायतका माग गर्दै उद्योगी तथा व्यवसायी आन्दोलित बनेका हुन्।
नेपाल राष्ट्र बैङ्कले जारी गरेको चालू पुँजीसम्बन्धी निर्देशन र त्यही निर्देशनका आडमा निजी क्षेत्रलाई धराशायी बनाउने गरी बैङ्कले गरेको ब्याजदर वृद्धिविरुद्धमा व्यवसायीले आन्दोलन थालेको दाङ जिल्ला उद्योग वाणिज्य सङ्घका अध्यक्ष टङ्क बुढाथोकीले बताउनुभयो।