यस क्षेत्रको बिकास गर्ने जिम्मेवारी मेरो होः बलदेव

कपिलवस्तु निर्वाचन क्षेत्र नम्बर १ प्रतिनिधि सभा सदस्यका उम्मेदवार चक्रपाणी खनाल (बलदेव)ले यस क्षेत्रको बिकासको जिम्मेवारी आफुले लिने बताएका छन् ।

कपिलवस्तु १(१) अन्तर्गत पर्ने कपिलवस्तु नगरपालिका वडा नम्बर ९ (साबिकको निग्लिहवा गाबिसको सबैभन्दा ठूलो गाउँ) कुस्मामा आज आयोजित कोणसभामा बोल्दै बलदेवले कुस्माका पहाड्डी, बैरेनी, भँगैया, हात्तिसार, पिपलडाँडाको समग्र बिकासको जिम्मा आफुले लिने बताएका हुन् । यहाँ रहेका कृषि, सिचाइ, स्वास्थ्य, शिक्षा, सुकुम्बासी लगायतका समस्याको समाधानका लागि आफू हरतरहबाट पहल गर्ने उनले बताए । कुस्मेली माटो र जनतासङ्ग आफू राम्रोसँग भिजेको बताउदै यहाँका समस्याको सहि पहिचान सहित समाधानको बाटो सहजै पहिल्याएको समेत उनको भनाइ छ ।

कुस्मेली मतदाताले उम्मेदवारले गरेका प्रतिबद्धतालाई कार्यान्वयन पनि गर्नुपर्ने तर्फ ध्यानाकर्षण समेत गराएका थिए ।
यसैगरी बलदेवले निर्वाचन पछिको सरकार बाम-लोकतान्त्रिक गठबन्धनकै बन्ने समेत बताए । सरकार बनेपछि जिल्लाको समग्र विकासले गति लिने र अधुरा योजना समेत प्राथमिकतामा राखि काम गर्ने बताए ।

निर्वाचन परिचालन समिती वडा संयोजक देबेन्द्र पोख्रेलको सभापतित्व रहेको कार्यक्रमको संचालन नेकपा (माओवादी केन्द्र) कपिलवस्तु संयोजक बिष्णु बेल्बासेले गरेका थिए ।