रुकुमपूर्वका उम्मेदवारले निर्वाचन खर्च बुझाउँदै

रुकुमपूर्व २० मङ्सिर । मङ्सिर ४ गते भएको प्रतिनिधि र प्रदेश सभाको निर्वाचनमा रुकुमपूर्वबाट उम्मेदवार भएका छ जनाले खर्च विवरण बुझाउनु भएको छ । प्रतिनिधि सभाका छ र प्रदेश सभाका १२ जना गरी कुल १८ जना उम्मेदवार रहेकोमा अहिलेसम्म छ जनाले जिल्ला निर्वाचन कार्यालयमा निर्वाचन खर्च बुझाउनु भएको हो । अब १२ जनाले निर्वाचन खर्च बुझाउन बाँकी रहेका छन् ।
निर्वाचन खर्च बुझाउनेमा प्रतिनिधि सभाका तीन जना र प्रदेश सभाका तीन जना रहनुभएको छ । जिल्ला निर्वाचन कार्यालयकाअनुसार प्रतिनिधि सभातर्फ नेकपा एमालेका कैलाशकुमार मल्ल, राप्रपाका खिमबहादुर खत्री र नेश्नलिष्ट पिपल्स पार्टीका बलबहादुर बुढाले खर्च विवरण बुझाउनु भएको हो ।
एमालेका मल्लको खर्च तीन लाख ८६ हजार पाँच सय ८५, राप्रपाका खत्रीको एक लाख २५ हजार ४० र नेश्नलिष्ट पिपल्सका बुढाको खर्च दुई लाख ४६ हजार ४० रुपियाँ रहेको जिल्ला निर्वाचन अधिकारी तेजकुमार ओलीले जानकारी दिनुभयो । त्यस्तै प्रदेश सभा क मा नेकपा माओवादी केन्द्रका उम्मेदवार तेजबहादुर ओलीले मात्र खर्च विवरण बुझाउनु भएको ओलीले बताउनुभयो । ओलीको चुनाव खर्च १८ लाख ९५ हजार ७१५ रुपियाँ रहेको निर्वाचन अधिकारी ओलीको भनाइ छ ।
प्रदेश सभा निर्वाचन ९ख० बाट दुई जनाले मात्र खर्च विवरण बुझाउनुभएको छ । खर्च विवरण बुझाउनेमा नेपाली कांग्रेसबाट निर्वाचित धनबहादुर केसी र नेकपा एमालेका उम्मेदवार भावना बुढाथोकी रहनुभएको छ । निर्वाचनमा विजय हासिल गर्नुभएका केसीले आफ्नो चुनाव खर्च १३ लाख दुई हजार ५२७ रुपैयाँ रहेको विवरण बुझाएको निर्वाचन कार्यालयले जनाएको छ ।
एमालेका उम्मेदवार बुढाथोकीले आफ्नो खर्च तीन लाख ६० हजार ४५ रुपियाँ रहेको विवरण बुझाउनुभएको छ । निर्वाचन आयोगले रुकुमपूर्व प्रतिनिधि सभातर्फ बढीमा २७ लाख र प्रदेश सभा क मा १९ लाख तथा प्रदेश सभा ख मा १७ लाख रुपियाँसम्म खर्च गर्न पाउने अधिकार दिएको थियो ।
एक प्रतिनिधि र दुई प्रदेश सभा रहेको रुकुमपूर्वमा कुल १८ जना उम्मेदवार रहेकामा अब १२ जनाले खर्च विवरण बुझाउन बाँकी रहेको जिल्ला निर्वाचन कार्यालय रुकुमपूर्वले जनाएको छ । खर्च विवरण बुझाउन बाँकी मध्ये प्रतिनिधि सभा सदस्यमा निर्वाचित नेकपा माओवादी केन्द्र का पूर्णबहादुर घर्तीमगर र प्रदेश सभा क मा निर्वाचित स्वतन्त्र उम्मेदवार सुरुल पुनमगरलगायत छ । चुनाव लडेका उम्मेदवारले अन्तिम मत परिणाम सार्वजनिक भएको ३५ दिन भित्र चुनाव खर्च निर्वाचन कार्यालयमा बुझाउनुपर्ने व्यवस्था छ ।